Acuerdu del Conseyu de Gobiernu de la Universidá d’Uviéu de 17 de xunetu de 2020, pol que s’aprueba’l Códigu Éticu de la Universidá d’Uviéu

La Universidá d'Uviéu ye una institución de derechu públicu que desenvuelve les sos funciones como serviciu públicu d'educación superior y d'investigación científica y técnica, con especial atención y interés pola realidá d'Asturies.

Por Acuerdu de 15 d'avientu de 2017, de Conseyu de Gobiernu de la Universidá d'Uviéu, aprobóse'l Reglamentu del Comité d'Ética col encargu espresu d'elaborar un Códigu Éticu. El so oxetivu ye apurrir un conxuntu de compromisos y conductes que pueda sirvir d'orientación pa los distintos colectivos de la Universidá d'Uviéu nel exerciciu de les sos funciones y nel esfrute de los sos derechos. Cola elaboración d'esti Códigu Éticu, la Universidá d'Uviéu pretende complementar la observación de la llei, introducir meyores y prevenir conflictos, favoreciendo la puesta en práctica d'un círculu virtuosu nel serviciu públicu universitariu.

Los códigos éticos son voluntarios y verbalicen lo que yá existe de dalguna manera na conciencia de la comunidá qu'acuerda aplicalos. Nesti sentíu, el Códigu Éticu diríxese a toles persones y colectivos que componen la Universidá d'Uviéu, y tien como meta fundamental coordinar les sos relaciones y les del so personal con entidaes y empreses esternes qu'empresten servicios o colaboren cola Universidá d'Uviéu.

D'últimes, esti Códigu Éticu tenta de ser la materialización del compromisu de tola comunidá universitaria pa construyir ente toes y toos una universidá más responsable, más xusta y más comprometida.

Parte I. Principios y valores comunes

1. Los valores y principios polos que se rixe la Universidá d'Uviéu son: llibertá, igualdá, respetu a la diversidá, honradez intelectual, responsabilidá social, tolerancia ideolóxica y solidaridá, según el principiu de llegalidá, la tresparencia, la igualdá d'oportunidaes, la inclusión, la sostenibilidá y demás valores y principios recoyíos nos sos Estatutos, como componentes imprescindibles de la escelencia académica dictada pola institución, nun ámbitu democráticu qu'inclúi'l rechazu d'actitúes violentes, sectaries, totalitaries y dogmátiques.
2. Los miembros de la comunidá universitaria van velar pol mantenimientu y l'usu eficiente, responsable y sostenible de los recursos de la Universidá d'Uviéu, destináu a fines puramente institucionales.
3. Nengún miembru de la comunidá universitaria va poder dar o recibir regalos o dones nel exerciciu de la so actividá profesional y/o académica, más allá de los de cortesía social y de calter institucional o corporativu.
4. Va promovese la inclusión de clauses de sostenibilidá ambiental y social en tolos procedimientos de contratación.
5. Los miembros de la comunidá universitaria van procurar implicase nos distintos procedimientos de participación y consulta de la Universidá d'Uviéu, guardando la debida reserva cuando se trate información de calter confidencial.
6. Los miembros de la comunidá universitaria van colaborar, na midida de les sos posibilidaes, nes distintes actividaes y campañes de calter sostenible y/o solidariu que s'organicen nel senu de la Universidá d'Uviéu.
7. Los miembros de la comunidá universitaria van velar pol bon nome de la Universidá d'Uviéu, diferenciando en tou momentu aquelles situaciones nes que s'actúa a títulu personal d'aquelles nes que s'actúa en representación de la universidá o en calidá de miembru de la comunidá universitaria.
8. Los miembros de la comunidá universitaria, dientro de la so llibertá d'espresión, van facer un usu respetuosu de les redes sociales. En nengún casu tien de facese un usu ensin autorizar de la imaxe de los miembros de la comunidá universitaria, especialmente si dicha imaxe s’estrái de fontes universitaries.

Parte II. Previsiones específiques pa los equipos de gobiernu y dirección

1. Los miembros de los equipos de gobiernu y dirección van informar de tou conflictu d'interés que surda nel desempeñu de les sos funciones y van atenese a la decisión que s'adopte al respecto.
2. Nel desempeñu de les sos funciones, los miembros de los equipos de gobiernu y dirección van actuar en tou momentu de manera respetuosa y ensin incurrir n'arbitrariedaes, conductes autoritaries nin abusos de poder.
3. Énte situaciones que se desenvuelvan nel contestu universitariu y que carezan d'una previsión espresa, van consultase los servicios pertinentes, procurando en tou momentu la equidá y imparcialidá de los procedimientos.
4. Dientro del ámbitu propiu de competencies, va ponese especial cuidáu en mantener informaes del estáu de la tramitación a aquelles persones qu'unviaren solicitúes, quexes o peticiones, cola mayor dilixencia posible.
5. Con independencia de les obligaciones propies de cada órganu, les persones qu'ostenten cargos de responsabilidá tendrán de responder y informar de manera periódica, dialogante y respetuosa sobre'l so desempeñu institucional.
6. Les persones qu'exerzan cargos de dirección van usar en tou momentu los documentos de trabayu y l'información al so alcance pa fines puramente institucionales, manteniendo la debida reserva y confidencialidá.
7. Les persones que formen parte de los equipos de gobiernu y dirección nel marcu de la organización universitaria van velar pola conocencia y cumplimientu d'esti códigu.

Parte III. Previsiones específiques pal Personal Docente y Investigador

1. El personal docente y investigador va persiguir la meyora continua de la práctica docente y investigadora por aciu del esfuerzu personal, la formación permanente, l'estudiu, l'actualización del currículu docente y investigador y la innovación.
2. L'actividá docente va procurar la formación científica y humana del estudiantáu, absteniéndose de tresmitir dogmes contrarios a la cultura democrática y de paz o a los derechos fundamentales protexíos pola Constitución, y promoviendo’l pensamientu críticu como un valor central na actividá docente universitaria, nel marcu de la llibertá de cátedra.
3. El personal docente y investigador va mantener en tou momentu una actitú respetuosa y de diálogu con tolos colectivos de la comunidá universitaria, ensin incurrir n'arbitrariedaes, conductes autoritaries nin d'abusu de poder.
4. Les actuaciones docentes van facese con honradez, integridá y oxetividá, ensin xenerar situaciones de conflictu d'intereses derivaes de relaciones de calter personal, familiar o profesional.
5. Nel desenvolvimientu de la docencia respetaránse los derechos del estudiantáu, ensin realizar discriminación dalguna por causa de relixón, etnia, sexu, identidá de xéneru y orientación sexual, clase social o cualesquier otra circunstancia personal.
6. El profesoráu va facer les adaptaciones precises requeríes pol alumnáu con diversidá funcional o otres necesidaes d'aprendizaxe, en colaboración cola Oficina d'atención a les persones con necesidaes específiques de la universidá. Na midida de les sos posibilidaes, el profesoráu va elaborar los sos materiales docentes con arreglu a los principios de diseñu universal.
7. El personal investigador va rexise pol principiu de la honradez intelectual, refugando'l plaxu, según l'apropiación intelectual del trabayu d'otres persones y l'atribución de l'autoría d'un trabayu nel que nun se participó. Va buscase la tresparencia nos métodos y resultaos, y toles persones que colaboraren nun proyectu van ver reconocíu'l so trabayu.
8. Dientro del respetu a la lexislación vixente y les previsiones d'esti códigu, el personal investigador va gozar de llibertá pa desenvolver los sos proyectos, empobinándolos na midida de lo posible pel marcu de la sostenibilidá ambiental y social.
9. Les investigaciones nes qu’haya esperimentación animal y/o humana van tener siempres presente, amás del marcu llegal, los estándares afitaos pol comité d'ética na investigación nel diseñu, execución y divulgación de los resultaos de la investigación. Igualmente na docencia evitaránse práctiques sobre animales vivos, que puedan ser sustituyíes por otros métodos, procedimientos o visionaos y ensin desterciu de la calidá de la formación.
10. El personal docente y investigador va participar, na midida de les sos posibilidaes, n'actividaes de divulgación científica, técnica y cultural como parte del compromisu de la universidá na tresferencia de conocimientu a la sociedá en xeneral.

Parte IV. Previsiones específiques pal Personal d’Alministración y Servicios

1. El personal d'alministración y servicios va procurar realizar el so trabayu con dilixencia, profesionalidá y eficiencia, arreglando de forma respetuosa y dialogada los conflictos que puedan surdir, ensin incurrir n'arbitrariedaes, conductes autoritaries nin d'abusu de poder.
2. El personal d'alministración y servicios va persiguir la meyora continua de la prestación de servicios por cuenta del esfuerzu personal, l'adaptación al cambéu y la formación permanente.
3. Les actuaciones alministratives y d’apoyu van realizase con honradez, integridá, oxetividá y tresparencia, evitando situaciones de conflictu d'intereses derivaes de relaciones de calter personal, familiar o profesional.
4. El personal d'alministración y servicios va respetar los derechos de les persones usuaries, ensin cayer en discriminación dalguna por causa de relixón, etnia, sexu, identidá de xéneru, orientación sexual, clase social o cualesquier otra circunstancia personal o social. Coles mesmes, va realizar les adaptaciones precises requeríes pol alumnáu con diversidá funcional, en colaboración cola Oficina d'atención a les persones con necesidaes específiques de la universidá.

Parte V. Previsiones específiques pal Estudiantáu

1. L'estudiantáu va buscar la escelencia académica pola dedicación, l'esfuerzu y l'asistencia a les clases nes modalidaes presenciales.
2. L'estudiantáu comprométese a aprovechar al máximu los recursos a la so disposición, faciendo un usu afayadizu y sostenible de los mesmos.
3. L'estudiantáu va tener una actitú non discriminatoria, respetuosa y dialogante pa resolver conflictos con tolos colectivos de la comunidá universitaria. Si detecta casos d'acosu, falta de respetu o discriminación nel so entornu, tendrá de facer lo posible por qu’esos fechos lleguen al conocimientu de la Unidá d'Igualdá de la Universidá d'Uviéu.
4. La honradez, la integridá intelectual y el rechazu de toa conducta fraudulenta son principios fundamentales nel desenvolvimientu de les actividaes académiques y les pruebes d'evaluación, incluyíos los Trabayos de Fin de Grau (TFG), Trabayu Fin de Máster (TFM) y Tesis Doctorales. Refiértase la realización de plaxu al traviés de l'apropiación d'idees ayenes ensin el correspondiente reconocimientu, la presentación d'un mesmu TFG o TFM en distintes titulaciones, según cualesquier actuación na que sía una tercer persona la que faga les pruebes d'evaluación, TFG, TFM o Tesis Doctoral, al marxe de si media o non relación comercial al respecto.
5. L'estudiantáu tien de facer un bon usu de les redes sociales, absteniéndose la publicación d'apuntes o presentaciones académiques facilitaes pol profesoráu, ensin el debíu permisu.