La Universidá d'Uviéu cunta con una importante cantera nel mundu de la escena. Una de les actividaes con más éxitu ente los universitarios ye'l Grupu de Teatru.
Les artes escéniques son una de les pieces clave de la ufierta cultural de la Universidá d'Uviéu. El Grupu de Teatru de la Universidá d'Uviéu (GTUO) ta compuestu mayoritariamente por alumnos, que participen nos ciclos de teatru universitariu y realicen actuaciones en teatros, cases de cultura y otres sedes.
Al marxe de poner n'escena distintos montaxes, el Grupu de Teatru Universitariu fomenta l'intercambéu con otres formaciones universitaries, fundamentalmente les Universidaes integraes nel Grupu G9.
La so sede ta situada nel Aulariu A del Campus de Santuyano (Facultá de Filosofía y Lletres) y les distintes actividaes y actuaciones vinculaes al GTUO organícense dende'l Vicerrectoráu d'Estensión Universitaria y Proyección Cultural.
La programación compónse de dos cursos: iniciación y puesta n'escena. Nel primer casu, facilítase al alumnáu una iniciación práctica nel arte de representar, xesticular, declamar, imitar, movese… Esto ye, enséñense les ferramientes imprescindibles pa poder actuar (l'usu del cuerpu, de la emoción y de la voz), según les distintes técniques teatrales: comedia del arte, teatru oriental, improvisación, na que se fai usu de la palabra como ferramienta indispensable pa cualquier actor.
Nel segundu cursu faise una práctica actoral consistente nel montaxe d'un espectáculu que va ser representáu per distintes localidaes asturianes.
Al fin de l'actividá l'alumnu matriculáu na Universidá d'Uviéu al que se-y acreditara una participación de siquier un 90% de les hores establecíes va poder convalidar la so participación por 3 Creitos ECTS.
L'actividá compleméntase con dellos talleres teatrales que ponen sobre les tables dalgunos de los meyores montaxes nacionales actuales y el teatru fechu n'Asturies y complementa la práctica teatral, arriqueciéndola. Toles representaciones organizaes dende Estensión Universitaria son gratuites y abiertes a tola sociedá.
Enllaces relacionaos
