Asturies ye una de les rexones d'España con un meyor índiz de calidá de vida. Con aproximao un millón d'habitantes, el Principáu d'Asturies cuenta con un patrimoniu natural, históricu y cultural que convierte la comunidá en puntu de referencia pa visitantes de tol mundu. Un sitiu tranquilu y accesible, caracterizáu pola hospitalidá de les sos xentes y un entornu natural privilexáu.

Asturies ye pal visitante un sitiu tranquilu y accesible, con una alta calidá de vida y un entornu natural privilexáu.

El Principáu ye una rexón pequeña n'estensión, lo que dexa esfrutar fácilmente de la so riqueza natural mui cerca de les ciudaes. Los grandes núcleos residenciales tán situaos nel centru de la rexón y atópense bien comunicaos en distancies que nun pasen de la media hora en coche, autobús o tren. Uviéu, Xixón, Mieres y Avilés son ciudaes de tamañu mediu, qu'ufierten a los sos habitantes una amplia gama de servicios públicos y una intensa ufierta d'ociu cultural. Estes cuatro ciudaes atópense ente les más segures d'España.

Los espectaculares recursos naturales del paisaxe asturianu tán bien presentes na vida diaria de los sos habitantes. L'entornu ye privilexáu pa esfrutar de les actividaes al aire llibre con un cientu de rincones pa los aficionaos al monte o a la playa. El clima asturianu dexa, por exemplu, esfrutar de deportes tan distintos como'l surf y l'esquí.

El sector servicios lleva'l pesu fundamental de l'actividá económica asturiana, anque la industria pesada de la siderurxa tien un papel destacáu nel PIB asturianu. Asturies ye una de les rexones más segures del país y conectada col restu d'España y Europa al traviés d'un aeropuertu Internacional, redes de ferrocarriles de cercaníes y llargu percorríu y tresporte per carretera.

Los sistemes d'educación y salú públicos del Principáu d'Asturies atópense ente los meyor valoraos d'España.

El costu de la vida n'Asturies

Los gastos mensuales d'un estudiante estranxeru pueden oscilar ente los 600 y los 800 euros al mes, dependiendo la modalidá d'agospiu qu'escueya. Nun existe límite tocante a la cantidá de divisa que l'estudiante estranxeru puede trayer a España. Aconséyase l'usu d'una tarxeta de creitu y l'apertura d'una cuenta bancaria.

P'abrir una cuenta nuna entidá bancaria establecida n'España ye precisu que l'estudiante estranxeru solicite un númberu d'identificación (N.I.E.), que se-y va facilitar solicitando la tarxeta de residencia na Oficina d'Estranxeros.

España nun ye un país caru, anque'l costu mediu de vida varia enforma. Ciudaes grandes como Barcelona, Madrid, y Bilbao son muncho más cares que les ciudaes más pequeñes como Uviéu o Xixón.