REUNIDO ye un portal de revistes electróniques de la Universidá d'Uviéu, que'l so oxetivu principal ye l'espardimientu de la investigación. En REUNIDO atópense disponibles toles revistes, coles sos colecciones completes, editaes pol sellu editorial de la Universidá d'Uviéu, en versión dixital y accesu abiertu.
La edición y xestión electrónica de les revistes editaes pola Universidá d'Uviéu realízase nel programa Open Journal System (OJS), de códigu abiertu y llibre distribución. Open Journal Systems (OJS) ye un software de baldre que dexa xestionar tol procesu editorial d'una revista y la so posterior publicación electrónica. OJS desarrollóse pol Public Knowledge Project, organismu canadiense integráu poles universidaes British Columbia, Simon Fraser y l'Universidá de Stanford, que busca facilitar el desenvolvimientu de publicaciones n'accesu abiertu.
OJS ufierta una solución integral que permite un manexu eficiente y unificáu de too el procesu editorial, dende l’unviu d'artículos per parte de los autores, pasando pela so evaluación, hasta la so publicación final, indexación y llectura. El so oxetivu ye incrementar la calidá de les publicaciones, faciendo más tresparentes les polítiques de la revista y ameyorando l’indexáu.
REUNIDO ufierta la colección completa de Archivum, revista creada en 1951 y hasta agora espardida y mala d’atopar; tamién tán disponibles Res Mobilis, Trabayos de Xeoloxía, Lliñu, Ería, Territoriu, Sociedá y Poder, Revista electrónica de Metodoloxía Aplicada, Revista de Filoloxía Asturiana, y Economics and Business Letters, ente otres. Tamién se topa en REUNIDO la colección íntegra de Psicothema, revista editada pol Colexu de Psicólogos del Principáu d'Asturies y venceyada a la Universidá d'Uviéu.
Enllaces relacionaos
