La Universidá d'Uviéu dispón d'instalaciones deportives nes tres ciudaes nes que tán situaos los sos campus (Uviéu, Xixón y Mieres). Les infraestructures deportives de la institución académica ponen a disposición de los sos alumnos y personal una amplia ufierta de disciplines con toles comodidaes.
Amás de los equipamientos situaos nos sos campus, la universidá cuenta con un albergue universitariu con precios asequibles na estación d’hibiernu de Payares pa tolos aficionaos al monte y la práctica del esquí.
Uviéu
N'Uviéu tán centralizaos tolos servicios alministrativos. L'estadiu al aire llibre cuenta con pista sintética d'atletismu, circuitu sintéticu pa facer carrera continua, campu de fútbol, pista de fútbol sala, pista de tenis y zona pa llanzamientos.
L'edificiu qu'alberga la piscina climatizada cunta amás con una sauna masculina y otra femenina, una sala polivalente y una sala de fitness-ximnasiu. Finalmente, la instalación del polideportivu cubiertu, amás de la pista polideportiva, dispón de les oficines de xestión y residencia de deportistes.
Mieres
Nel Campus de Mieres, la universidá cunta con un polideportivu cubiertu que disóon amás d'una sala polivalente, una sauna, una sala de fitness-ximnasiu y les oficines de xestión. Dispón tamién de cuatro pistes de pádel, dos de tenis, un campu d’herba sintético pa la práctica de futbol siete y un circuitu de ceniza pa facer carrera continua.
Xixón
Nel campus de de Xixón, la universidá ufierta a tola comunidá pistes descubiertes pa la práctica de fútbol sala, baloncestu y tenis.
Albergue universitariu d'El Brañil.lín en Payares
Esta instalación, situada na estación d'hibiernu de Payares, a pie de pistes, cunta con habitaciones pa dos, cuatro y seis persones, amplios salones, cafetería y parking.
