La Orquesta de la Universidá d'Uviéu fixo’l so primer conciertu'l 14 de febreru de 1979, baxo la dirección del so fundador Alfonso Ordieres, antiguu concertín de la Orquesta Sinfónica d'Asturies. La Universidá d'Uviéu, gracies al enfotu personal del por entonces rector Teodoro López Cuesta, conviértese asina na primer Universidá d'España en cuntar con una orquesta.
La primer etapa de la orquesta dura casi una década y nesti periodu fai numberosos conciertos y participa en diversos cursos y festivales per delles ciudaes españoles como Cambrils, Granada y Madrid. Destaquen, ente otros, el conciertu pa los Reis d'España nel actu de constitución de la Fundación Princesa d'Asturies en 1980 y les grabaciones feches pa TVE.
Tres un llargu periodu d'inactividá, la orquesta toma un nuevu impulsu baxo la dirección de Pedro Ordieres nel cursu 2017/18 y debuta n'ochobre 2017 n'A Veiga, dientro de los actos de clausura del Foru de Comunicación y Escuela. Dende aquello, la formación actuó n'Uviéu, Xixón, L.luarca, A Caridá, Mieres o Candás. Destaca'l conciertu de Navidá na Catedral d'Uviéu y l'ilesia prerrománica de Santuyano y el conciertu de clausura de la Feria de Muestres d'Asturies 2018. Amás, en septiembre d'esi mesmu añu, la orquesta realiza la primer grabación d'una banda sonora pal documental producíu pola TPA "Desde la otra orilla" baxo la dirección de Rubén Díez.
La orquesta, al igual que'l Coru de la Universidá d'Uviéu, enmárcase dientro de l'actividá del Vicerrectoráu d'Estensión Universitaria y Proyección Cultural. Na so nueva etapa crez hasta convertise nuna orquesta sinfónica formada por más de 50 componentes pertenecientes a la comunidá universitaria asturiana.
Réxime internu
Los ensayos de la orquesta son nel aula Magna de la Escuela d'Inxeniería de Mines, Enerxía y Materiales d'Uviéu na Cai de la Independencia, 13, 33004 Uviéu.
Los horarios regulares son tolos miércoles de 18:45 a 21:30 hores, anque estos horarios pueden variar llixeramente a lo llargo del cursu p'adaptase a les actuaciones.
Ayudes a los componentes de la Orquesta
Cada miembru de la orquesta qu'acredite la so participación va recibir la convalidación de tres creitos ECTS al finalizar el cursu.
La institución académica convoca añalmente ayudes específiques a la matrícula pa los componentes de la orquesta. (Los alumnos interesaos en consultar más información pueden alcontrar la última convocatoria na Intranet).
Directores
- Pedro Ordieres (director actual)
- Alfonso Ordieres
Pedro Ordieres
Naz n'Uviéu en 1979, empieza los sos estudios musicales a la edá de seis años con so pá, Alfonso Ordieres. Bien ceo, ingresa nel Conservatoriu Superior de Música d'Uviéu onde sigue estudiando col pá, cola profesora Gaiane Pogossova y el vigulineru Amayak Durgarian. En 1998, con 19 años, llogra'l títulu de profesor superior de vigulín coles más altes calificaciones y Premios de Grau Elemental y Mediu. En 1998 treslládase a Londres y ingresa nel Royal College of Music en calidá de "Scholar" (becáu) onde fai cuatro años d'estudios de vigulín con Itzhak Rashkovsky y de dirección d'orquesta con Nell Thompson. En xunetu de 2002, llogra'l títulu de llicenciáu con sobresaliente (BMUS) pol Royal College of Music de Londres.
Pa facer los estudios foi becáu pola Caxa d'Asturies, el Principáu d'Asturies, l'Asociación d'Interpretes española (AIE) y en dos ocasiones pol entós denomináu Ministeriu d'Educación y Cultura d'España.
Na so formación orquestal, destaca'l so ingresu con 16 años na Nueva Orquesta Nacional d'España (J 0 N D Y) y la so pertenencia a la Royal College Symphony de Londres, na que trabayó con maestros de la talla de Bernard Haitink, Colin Davis o Lorin Maazel.
Como solista o integrante de diversos grupos de cámara, realizó conciertos en numberoses ciudaes d'España y Inglaterra, participó en distintos festivales de música de cámara como Cuenca o Torroella de Montgrí, según numberosos recitales nos que formó dúu col pianista Francisco Damián Hernández Díez, y como primer vigulín del cuartetu ÁSTUR.
Como profesor, impartió clase de vigulín, repertoriu orquestal y música de cámara nel Conservatoriu Superior de Música d'Asturies (CONSMUPA). Tamién foi convidáu por delles orquestes nueves pa impartir cursos o dirixir parciales con formaciones como la Joven Orquesta del Principado de Asturies (JOSPA) la Orquesta de la Universidá Menéndez Pelayo de Santander o la Orquesta del Reino de Aragón (ORA). Tamién foi convidáu a dirixir les orquestes deI Festival de Música Junior (FMJ´18) en Montalegre y Oporto. En xunu de 2002, con 23 años, llogró por oposición la plaza de vigulín co-principal de la Orquesta Sinfónica del Principado de Asturias (OSPA), qu'actualmente ocupa.
Datos de Contactu
Corréu electrónicu:
dir.orquesta@uniovi.es / orquesta.universitaria.oviedo@gmail.com
Facebook:
https://www.facebook.com/orquestauniversitariaoviedo
Twitter:
https://www.twitter.com/universitariaov
Canal de Youtube:
https://www.youtube.com/channel/UCufMtf3vYn-H5waZR6QwWyw
Videu Promocional:
Enllaces relacionaos
