El Grupu de debate de la Universidá d'Uviéu naz cola doble pretensión de formar a los sos integrantes nos aspectos teóricos y prácticos del alderique en xeneral y del alderique académicu en particular y de facilitar la selección del equipu que va representar a la Universidá d'Uviéu na Lliga de debate interuniversitariu qu'organicen les Universidaes del G9 (Isles Baleares, Pública de Navarra, País Vascu, Estremadura, Zaragoza, La Rioxa, Cantabria, Castiella-La Mancha y Uviéu).
Dende la so primer edición en 2009 na Universidá Pública de Navarra, la Lliga de debate Interuniversitariu celebróse añalmente nuna de les universidaes del grupu. La d'Uviéu foi sede de la IV edición, en 2012. L'equipu que va representar a la nuestra universidá na lliga de debate ye fundamentalmente’l Grupu de debate, que sigue asina, anque con dellos cambios, el llabor iniciáu en 2011 col Aula de debate d'Estensión Universitaria.
DESTACAO
Los oxetivos del Grupu de debate son fomentar ente los estudiantes el diálogu y la confrontación d'idees con públicu como exerciciu de convivencia y desarrollu de les habilidaes personales, así como promover la cultura del alderique na institución académica.
El formatu de la Lliga Interuniversitaria de debate ye tamién ún de los más habituales: los equipos (ún por cada Universidá del G9) conocen de mano’l tema que va ser oxetu de la contienda, pero solo unos segundos primero de qu'empiece la competición saben, por sortéu, si-yos va tocar defender la postura a favor o en contra. Los equipos que ganen pasen a les fases socesives, polo que, si se van superando les distintes fases, ye bien probable qu'un mesmu equipu tenga de defender dambes postures.
Los miembros del Grupu de debate de la Universidá d'Uviéu van recibir formación teórica y práctica dirixida a elaborar argumentos relevantes, lóxicos, correctos y bien fundamentaos; distinguir los puntos débiles d'un argumentu; realizar bones introducciones y bones conclusiones de los temes trataos; estructurar correctamente'l conteníu de la intervención, adecuándose a les riegles específiques que rixen en cada casu; controlar la técnica vocal y el llinguaxe corporal; aprender a falar y a actuar énte un públicu, dominando la voz, l'espaciu y el cuerpu; aprender a trabayar n'equipu...
Toos estos conocimientos y toes estes habilidaes y destreces van ser ensin dulda bien útiles tanto nel ámbitu académicu como nel ámbitu profesional (defensa de trabayos, presentación de proyectos), si bien el so aprendizaxe dientro del Grupu de debate va tar condicionáu pol formatu de los alderiques de la Lliga Interuniversitaria del G9.
A debatir tamién s'apriende debatiendo, por eso en toles sesiones del Grupu d’Alderique habrá una parte de calter prácticu y va procurase qu'en toes haya debates. Na primer sesión, va esplicase'l Reglamentu de la Lliga de debate del G9, van formase los equipos de partida y va analizase brevemente’l primer tema que los miembros del grupu van tener que preparar pa los debates que se desenvuelvan en caúna de les restantes sesiones. Quien nun tea debatiendo va actuar como xuráu y árbitru nos términos qu'establez el mentáu reglamentu. D'esti mou, los miembros del Grupu de debate van tener ocasión d'entrenar les conocencies y habilidaes que vaigan adquiriendo enfrentándose, por equipos, ente sí.
A efectos organizativos, nel programa de sesiones del Grupu de debate distinguiráse ente un grupu d’iniciación y un grupu avanzáu.
Documentos relacionaos
