La Universidá d'Uviéu ye la única institución pública d'educación superior nel Principáu d'Asturies, una rexón de poco más d'un millón d'habitantes, con un paisaxe natural privilexáu, un ricu patrimoniu históricu artísticu y escelentes comunicaciones na área central de la rexón, onde se sitúen les principales ciudaes.
Esta comunidá atópase nuna situación xeográfica aparente pal desarrollu de la investigación y l'actividá empresarial, con modernes comunicaciones. Asturies tien un entornu natural d'escepción. Cerca d'un terciu del territoriu asturianu ta declaráu espaciu natural protexíu d'especial interés. Cinco zones gocien de la distinción de la UNESCO Reserva de la Biosfera: la Comarca Oscos-Eo y Terras de Burón, el Parque Nacional de Picos d'Europa y los Parques Naturales de Las Ubinas-La Mesa, Reres, Somiedu, y Fontes del Narcea, Degaña y Ibias. La calidá de les sos más de 200 playes tamién supon una atracción induldable pa los turistes y pa los mesmos habitantes de la comunidá autónoma.
El so patrimoniu históricu y artísticu ye una de les sos señes d'identidá, como los monumentos del arte Prerrománicu asturianu, declaráu Patrimoniu de la Humanidá pola UNESCO. Tamién ye merecedor d'esta distinción l'arte rupestre paleolíticu del Norte d'España, qu'inclúi 5 cueves asturianes de gran relevancia internacional. Amás, la rexón tien modernos equipamientos culturales.
Los Campus de la Universidá atópense n'Uviéu, Xixón y Mieres. Uviéu, la capital y centru políticu y alministrativu de la rexón, tien na arquitectura, tanto histórica como contemporánea, ún de los sos elementos más valiosos. Pela so parte, Xixón, la ciudá con mayor númberu d'habitantes d'Asturies, ye una localidá abierta que les sos playes y zones verdes confiéren-y un atractivu especial. Tamién Mieres cunta con un modernu campus universitariu. L'apueste de futuru d'esta localidá, de tradición minera, ta fuertemente lligada a la investigación tecnolóxica.
Paraísu Natural
Asturies ye un enclave natural privilexáu dientro de la variedá de paisaxes españoles. Ello ye que la rexón ye conocida en tol país como'l Paraísu Natural, l'eslogan que la define dende va décades. Una estensa parte del so territoriu cuenta con dalgún tipu de protección y la so costa atópase ente les meyor manteníes y menos urbanizaes de tol sur d'Europa. El clima asturianu favorez la existencia de gran variedá de vexetación y fauna nun entornu ideal pa practicar distintes actividaes al aire llibre o facer deporte.
La espectacular orografía del Principáu dexa atopar cumales de más 2.600 metros d'altor y playes bien guapes a una distancia en llínea recta d'apenes diez quilómetros. Esi contraste de paisaxes dexa esfrutar d'unes vistas inigualables y de dellos rincones y fenómenos naturales únicos.
La espectacular orografía asturiana permite atopar cumales de 2.600 metros y playes bien guapes a menos de diez quilómetros de distancia en llínea recta.
La riqueza natural d'Asturies fai posible una amplia ufierta d'ociu y deportes d'aventura a lo llargo y ancho del Principáu. La rexón cuenta col Parque Nacional de los Picos d'Europa y l'UNESCO declaró dientro de les sos llendes cinco territorios consideraos como Reserva de la Biosfera. Esti entornu natural únicu dexó la supervivencia y reproducción de delles especies en peligru d'estinción como l'osu pardu cantábricu, el gallu montés o'l frangüesos.
A lo llargo de los sos más de 350 quilómetros de costa, Asturies combina espectaculares cantiles con más de 200 playes, dalgunes d'elles casi víxenes. Trátase d'un emplazamientu ideal a lo llargo de tol añu pa la práctica de deportes náuticos.
