La Universidá del presente que mira pal futuru

La Universidá d'Uviéu destaca güei pola calidá de la so ufierta formativa y de la so investigación en toles árees del conocimientu: artes y humanidaes, ciencies, ciencies de la salú, ciencies sociales y xurídiques y inxeniería y arquitectura. La institución ta formada por once facultaes, seis escueles y tres centros asociaos, partíos nes tres ciudaes –Uviéu, Xixón y Mieres— nes que tán los sos campus.

Facultaes

• Bioloxía.
• Ciencies.
• Comerciu, Turismu y Ciencies Sociales Xovellanos.
• Derechu.
• Economía y Empresa.
• Filosofía y Lletres.
• Formación del Profesoráu y Educación.
• Xeoloxía.
• Medicina y Ciencies de la Salú.
• Psicoloxía.
• Química.

Escueles

• Escuela d’Inxeniería de Mines, Enerxía y Materiales d’Uviéu.
• Escuela d’Inxeniería Informática.
• Escuela Politécnica d’Inxeniería de Xixón.
• Escuela Politécnica de Mieres.
• Escuela Profesional de Medicina de la Educación Física y el Deporte.
• Escuela Superior de la Marina Civil.

Centros asociaos

• Facultá d’Enfermería de Xixón.
• Facultá Padre Ossó.
• Escuela de Doctoráu.

Graos, másteres, doctoraos y títulos propios

La institución académica imparte un total de 60 graos en toles árees del conocimientu, otros 60 másteres universitarios, cinco másteres Erasmus Mundus, 25 programes de doctoráu y 63 títulos propios.

Pero más allá de la enseñanza reglada, la institución académica ábrese a la sociedá con tres iniciatives formatives especialmente interesantes. La Casa de les Llingües, la Estensión Universitaria y el programa pa mayores PUMUO.

La Casa de les Llingües

La Casa de les Llingües tien como oxetivos primordiales potenciar la ufierta llingüística destinada a los estudiantes estranxeros qu'añalmente vienen estudiar a la universidá y ameyorar la formación n'idiomes de la comunidá universitaria y, por estensión, de la sociedá asturiana. Ta dirixida, por tanto, a dos llínees principales d'actuación: una dedicada a la enseñanza del español como llingua estranxera y otra centrada nel aprendizaxe de llingües y pa dar servicios de traducción y d'asesoramientu llingüísticu.

Estensión Universitaria

La Estensión Universitaria, supera les barreres de la formación más convencional, organiza cada añu más de 170 actividaes culturales qu'inclúin artes escéniques, conciertos, conferencies, concursos y premios, aules de docencia, esposiciones, xornaes, meses redondes o presentación de llibros.

Programa pa mayores PUMUO

El Programa Universitariu pa Mayores de la Universidá d'Uviéu, más conocíu como PUMUO, surde nel cursu 2001-2002, col propósitu, bien cercanu a la mesma razón de ser de la Estensión Universitaria, de favorecer la formación de persones mayores de 50 años que, en munches ocasiones y por circunstancies diverses, nun pudieron asistir a la universidá.  Dende la so creación nel cursu 2001-2002, impartieron docencia más de 400 profesores. En cuantes al alumnáu, solo nel últimu deceniu, pasó de 5000 persones. El perfil del estudiantáu ye bien variáu y ta integráu por persones que terminen la vida llaboral y quieren siguir formándose. Munches d'elles son muyeres que deseen ampliar los conocimientos cuando esfruten de más tiempu llibre.

La iniciativa, qu'empezó n'Uviéu, foi sumando sedes y actualizando los conteníos a la demanda social. Asina, primeramente, planteáronse dos años de formación, que, yá en 2003, s’allargaron a trés años y, agora, a cinco. Los participantes en PUMUO pueden recibir clases, amás de na sede de la universidá n'Uviéu, n'Avilés, dende'l cursu 2004-2005; en Xixón, dende'l 2011-2012; en Mieres, dende'l 2018-2019, y en L.luarca, dende'l 2020/2021. PUMUO ta fechu con asignatures y talleres de 15 hores llectives caúnu d'ellos. Son en total cuatro asignatures y dos talleres per semestre. Actualmente, el programa ufierta formación n'Humanidaes, Ciencies Xurídico-Sociales, Ciencies de la Salú y de la Vida, y Ciencia y Tecnoloxía.

Departamentos

La Universidá d'Uviéu ta organizada en 38 Departamentos de les cinco rames de conocimientu, a les que tán venceyaos la mayor parte del personal que fai llabores d'investigación. Los departamentos son les unidaes de docencia y investigación encargaes de coordinar les enseñances d'una o delles árees de conocimientu, nunu o dellos centros, según la programación docente de la universidá, d’apoyar les actividaes y iniciatives docentes y investigadores del profesoráu, lo mesmo que d’exercer aquelles otres funciones que-y encamienten estos estatutos o la llexislación vixente.

El prestixu de la Universidá d'Uviéu fíxo-y merecedora en 2009 del sellu de Campus d'Escelencia Internacional, que planteó la especialización en dos ámbitos científicos cola creación de dos clústeres: el Clúster d'Enerxía, Medioambiente y Cambéu Climáticu y el Clúster de Biomedicina y Salú. Dambos fueron el puntu de partida pa impulsar una investigación universitaria implicada n’ámbitu territorial y relacionada con centros tecnolóxicos, instituciones, empreses y sociedá civil, competitiva y eficaz na xestión, más internacional, y capaz de responder a los retos plantegaos pola sociedá. Un tercer clúster, focalizáu nes Ciencies Sociales y Humanidaes, tien por oxetu dinamizar la importante investigación que se lleva a cabu nestes árees tradicionalmente con menos visibilidá pública y dexa asina superar el conceptu d’investigación de bata blanca.

Homes y muyeres, protagonistes de la investigación

Tou esti trabayu nun diba ser posible ensin tener en cuenta los verdaderos protagonistes de la investigación: 2.000 homes y muyeres que trabayen sinérxicamente xuntos en 173 grupos acreditaos, con una potente presencia femenina liderando estes estructures. Los grupos d'investigación reconocíos tán en constante crecimientu y pasaron de los 21 de 2010 a los 173. Les árees con mayor númberu de grupos son Química Física y Analítica, Inxeniería Eléctrica, Electrónica, de Computadores y Sistemes, Informática y Psicoloxía.

La universidá pon a disposición del talentu investigador les escelentes infraestructures de los sos Servicios Científico-Técnicos (SCTs). Son un conxuntu d'unidaes que dan soporte a investigadores, grupos o equipos de la universidá, amás d’a otres entidaes públiques o privaes. Cunta con 18 unidaes que s'encuadren en tres categoríes de serviciu:

• Técniques d'análises: resonancia magnética nuclear, microscopía electrónica, difracción de rayos X, midíes magnétiques, espectrometría de mases, ensayos térmicos y análisis elemental, fluorescencia de rayos X y microsonda electrónica; y espectrometría fotoelectrónica, UV-visible y DIR.
• Llaboratorios d’ensayos: ensayos biotecnolóxicos y biomédicos, muestréu oceanográficu, bioteriu y ensayos preclínicos, nanotecnoloxía (inclúi membranes nanoporoses), tecnoloxía alimentaria y ensayos medioambientales.
• Apoyu tecnolóxicu: microscopía fotónica y procesu d’imáxenes, clúster de modelización científica, taller mecánicu y consultoría estadística.

Les instalaciones tán n’Uviéu, anque existen, amás, unidaes nos campus de Mieres y Xixón y ta prevista nun futuru la creación de nueves unidaes en dambos espacios.

Consciente de la necesidá d'afacese a los nuevos tiempos, la institución académica avanza hacia la universidá del futuru. Con esti propósitu dotóse d'un plan estratéxicu xeneral y dellos especializaos –estructura, investigación, infraestructures y ordenación académica—que van sentar les bases de la universidá del futuru.