Mal empiezu, bon final
El sieglu XIX empezó con mal pie pa la Universidá d’Uviéu y acabó con un protagonismu importante de la mesma nel ámbitu español.
La guerra contra los franceses
La guerra contra los franceses afectó gravemente, a partir de 1808, a la institución académica uvieína. Nesti periodu suspendiéronse les clases, l'edificiu foi saqueáu, perdiéronse muebles y menaxe y, sobremanera, quedó estropiada la biblioteca, de la que se perdieron los llibros con más valor y un escepcional monetariu, que fuera propiedá de la Compañía de Xesús y tuviera nel so uvieín Colexu de San Matíes hasta la espulsión de los xesuites en 1767. A la grave perda d'una parte importante de los bienes de la universidá, por causa de los acontecimientos bélicos, añedióse una mala alministración de los caudales y propiedaes de la institución. Por esa razón el centru docente entra nun llargu periodu de decadencia, acentuáu poles disposiciones absolutistes dictaes por Fernando VII, quien consideraba que la Universidá d'Uviéu yera un centru peligrosu porque nella impartíen doctrines contraries a la monarquía y a la relixón católica.
La universidá lliberal
El fin del Antiguu Réxime y la implantación de les doctrines lliberales n'España supunxeron un cambéu notable na universidá española. La entrada nel añu 1845 de la nueva llei d'enseñanza, conocida como Plan Pidal, porque l'entós ministru de Gobernación yera l'asturianu Pedro José Pidal, primer marqués de Pidal, entrañó una gran reforma de les universidaes. Creáronse nueves facultaes, modernizáronse otres, potenciáronse los estudios científicos y tomáronse midíes de distinta naturaleza, que fixeron más flexibles les instituciones d'enseñanza.
N'Uviéu, empiecen a cultivase con más intensidá les disciplines científiques, n'íntima unión coles cátedres qu'impartíen estudios d'esta naturaleza na Sociedá Económica d'Amigos del País d'Uviéu, y créanse los Gabinetes de Física, de Química y d'Historia Natural, amás d'un Xardín Botánicu importante, ensin escaecer la torre-observatoriu construyida dellos años más tarde pol rector León Salmeán y llevantada nel sitiu qu'ocupaba l'antigua espadaña de la capiya universitaria. Anque estos primeros estudios científicos instauraos a mediaos del sieglu XIX quedaron suspendíos, los citaos gabinetes y l'observatoriu siguieron desenvolviendo les sos actividaes y fueron el xerme pol que nos años finales del sieglu los estudios de Ciencies quedaren definitivamente lligaos a Uviéu. Depués de la supresión de la Facultá de Teoloxía y hasta la creación de la Sección de Ciencies en 1895, convertida en facultá en 1904, la única facultá existente como tal n'Uviéu yera la de Derechu, una y bones la de Filosofía y Lletres nun impartía les enseñances completes y, na práctica, les asignatures cursaes nella sirvíen de disciplines introductories pa la llicenciatura en Derechu.
El grupu d’Uviéu y la estensión universitaria
Con esa sola facultá, la universidá uvieína fíxose famosa en tol país. Nella nació nos últimos años del sieglu XIX un movimientu cultural y de renovación pedagóxica de gran valir, promovíu por un claustru de profesores nos qu’influyeron notablemente les idees krausistes, inspiradores de los principios pedagóxicos vixentes na Institución Llibre d'Enseñanza, fundada por Francisco Giner de los Ríos, ensin escaecer elementos ideolóxicos de calter rexonalista y conservador. Los nomes más destacaos fueron Leopoldo García Alas «Clarín», Aniceto Sela y Sampil, Adolfo González Posada, Adolfo Álvarez Buylla, l'alicantín Rafael Altamira y Crevea, Fermín Canella y Secades, Félix Aramburu, Víctor Díaz Ordóñez, Justo Álvarez Amandi, Guillermo Estrada y Rogelio Jove. Estos prohomes queríen poner en práctica les nueves idees qu’emanaben de la Institución Llibre d'Enseñanza. Estes idees non solo se restrinxíen al usu de nuevos métodos pedagóxicos dientro de la mesma entidá académica, sinón que pretendíen, ente otres innovaciones, que la enseñanza saliera de los murios universitarios pa entrar ente les capes más humildes de la población.
Esta doctrina, col so mensaxe de cultura popular estendida a toles clases sociales, que recibió'l nome d'Estensión Universitaria, xunto con un neohispanoamericanismu cultural de base histórica, son les notes dominantes del movimientu de renovación pedagóxica que se desenvolvió na Universidá d'Uviéu a finales del sieglu XIX. El grupu d'Uviéu, como se denominó esti conxuntu de profesores renovadores, tuvo un ecu enorme n'ámbitos nacionales y internacionales, impulsando l'admiración y emponderamientu unánimes pola so valentía a la hora de poner en práctica idees tan innovadores frente a la decadencia cultural del país. La repercusión social d'esti fenómenu foi enorme, non solo n'Asturies, sinón en toa España, y esa modalidá d'enseñanza popular espardióse rápido ente delles universidaes del país, llegando a les universidaes de l'América hispana.
Anque dalgunes d'eses grandes figures de la Universidá d'Uviéu morrieron ceo y otres fueron pa Madrid, polo que se puede dicir que'l movimientu desinfló a partir de 1910, la nuestra universidá siguió gozando, a pesar del so pequeñu tamañu, de notable prestixu en toa España, apoyáu pola presencia cada vez más grande de la Facultá de Ciencies. En tiempos de la Segunda República, el centru uvieín siguía cuntando nel so claustru con nomaos profesores nos ámbitos xurídicos, científicos y humanísticos y taba dirixíu pol rector Leopoldo Alas Argüelles, fíu de Clarín, el célebre escritor.
