L'actualmente denominada Facultá d'Enfermería de Xixón, qu'imparte'l grau nesta disciplina, foi creada en 1975 pol Institutu Nacional de Previsión como Escuela d'Ayudantes Técnicos Sanitarios anexa y dependiente de la entós Residencia Sanitaria “Gómez Sabugo”.

La facultá, a lo llargo de tola so evolución y como fechu diferencial, tresmitió una formación con plena identidá enfermera, impulsada dende la mesma dirección y dende les coordinaciones de les diverses árees de conocimientu, siempre ensin abandonar la necesaria perspectiva d'equipu multidisciplinar. Amás, contribuyó d'una forma decisiva al desenvolvimientu de les especialidaes d'Enfermería, de forma bien especial la de Matrona y de Salú Mental.

Esti centru pretende siguir siendo un referente nos ámbitos académicu y profesional, con un reconocimientu pola so actuación, compromisu y lideralgu na formación y investigación nes ciencies relacionaes col cuidáu humanu.