La Universidá d'Uviéu facilita la información y el sofitu que precisen los sos estudiantes pa participar en programes de movilidá y solicitar beques que faciliten la posibilidá de completar la so formación nuna universidá estranxera. La institución académica tamién ufierta la formación n'idiomes que l'estudiante necesita.
El millar d'alcuerdos y convenios de collaboración que la Universidá d'Uviéu tien con otres universidaes ufierta un escenariu ideal pa la movilidá internacional. La ufierta de destinos que pueden topar los nuesos estudiantes y profesores toma universidaes d'Europa, América, Asia, África y Oceanía.
Les beques y ayudes pa facer una movilidá internacional son una pieza clave pa llograr que'l mayor númberu d'estudiantes viaxe a una universidá estranxera. La Universidá d'Uviéu participa nos principales programes internacionales de movilidá y lidera dellos proyectos europeos pa fomentar l'intercambiu d'alumnos.
Una formación superior competitiva esixe'l manexu fluíu d'otros idiomes. Al traviés de La Casa de les Llingües los alumnos de la Universidá d'Uviéu tienen una amplia ufierta de cursos xenerales y actividaes pa meyorar les sos competencies llingüístiques. Quien lo desee va poder sometese na mesma universidá a los esámes oficiales d'inglés, francés, alemán ya italianu pa llograr les respectives titulaciones.
Programes de movilidá
Los alumnos de la Universidá d'Uviéu cuenten con diverses opciones pa poder facer una movilidá internacional. Caúna de les modalidaes adáptase a necesidaes y árees xeográfiques distintes..
Tolos alumnos interesaos en cursar parte de los sos estudios fuera d'España van topar tola información y asesoramientu necesarios nel Vicerrectoráu d’Internacionalización y al traviés de los responsables de rellaciones internacionales nos centros d'estudios.
Cada programa tien condiciones específiques nel ámbitu académicu y la cuantía económica de les posibles ayudes varia tamién. Los estudiantes interesaos en realizar una movilidá internacional han de consultar los requisitos específicos de caúna de les opciones. En resume, los programes de movilidá xestionaos al traviés del Vicerrectoráu d'Estensión Universitaria y Proyección Internacional son los siguientes:
Erasmus grau
Estudios de grau d'un cursu académicu o semestre de duración n'universidaes europees con alcuerdos institucionales vixentes, con reconocimientu d'estudios.
Erasmus posgráu
Estudios de posgráu (máster universitariu y doctoráu) d'un cursu académicu o semestre de duración n'universidaes europees con alcuerdos institucionales vixentes dependiendo de la duración del máster.
Erasmus docencia
Estancies docentes n'universidaes europees con alcuerdos institucionales vixentes, con un máximu financiáu de 5 díes y ayudes pal viaxe en función del destín.
Erasmus formación
Estancies de formación empobinaes al PDI o PAS n'Universidaes Europees con alcuerdos institucionales vixentes o otros organismos que nun sían Instituciones Europees d'Educación Superior, con un máximu financiáu de 5 díes y ayudes pal viaxe en función del destín.
Erasmus práctiques
Convocatoria de movilidá pa la realización de práctiques n'empreses y organizaciones europees, con una duración entendida ente 2 y 12 meses, nel marcu del Programa Erasmus +
Movilidaes de conveniu de grau
Estudio de grau d'un cursu académicu o semestre de duración n'universidaes de fuera d'Europa con alcuerdos institucionales vixentes y con reconocimientu d'estudios.
Movilidaes de conveniu de posgráu
Estudiu de posgráu d'un cursu académicu o semestre de duración n'universidaes de fuera d'Europa con alcuerdos institucionales vixentes dependiendo de la duración del máster.
Cursos de branu
Participación en cursos de branu empobinaos a promover ya incentivar la cooperación cultural con otros países, asina como’l perfeccionamientu llingüísticu nel idioma del país d'acoyida. La so realización desenvuélvese nel marcu de los convenios de collaboración suscritos pola Universidá d'Uviéu con otres instituciones estranxeres d'educación superior, ensin reconocencia d'estudios.
Tándem Bochum
La participación nel programa Tándem d'alemán en Bochum dexa perfeccionar la llingua, les competencies nel idioma alemán y llograr créditos al traviés d'una estancia.
Llectoraos
Programa de movilidá empobinada a estudiantes de grau y posgráu, al traviés de convenios internacionales, con universidaes ya instituciones socies qu'ufierten places de llectoráu a estudiantes de la Universidá d'Uviéu.
