Xeres pa estudiantes internacionales

La Universidá d’Uviéu facilita’l procesu de llegada y adautación de los sos estudiantes internacionales. Pa ello, la institución académica entama estremaes xeres camentaes especialmente pa que los alumnos estranxeros tomen contautu cola comunidá na que van a vivir y vayan conociendo pasu ente pasu toles oportunidaes que-yos ufierten la Universidá d’Uviéu y el so rodiu.

Cada estudiante podrá escoyer ente un estremáu programa d'opciones pa dir inxertándose adulces nel so nuevu país. Asina, los qu'apuerten a Asturies enantes del entamu del cursu académicu podrán tomar parte en xeres específiques de bienvenida.

La ufierta de xeres pa facilitar l'adautación de los alumnos estranxeros inclúi cursos d'español, propuestes d'ociu y cultura y una Selmana d'Acoyida enantes d'entamar les clases

Deprender o ameyorar la llingua española ye ún de los oxetivos cimeros de los estudiantes internacionales y podrán facelo pente medies de la bayurosa ufierta de Cursos d'Español pa estranxeros de la Universidá. Tamién hai la posibilidá de que los alumnos estranxeros collaboren y depriendan el so idioma maternu a compañeros o en clas per aciu de diferentes programes.

La llista d'opciones pa conocer y esfrutar de la estancia n'Asturies complétase con toles xeres que les estremaes Asociaciones d'estudiantes de la Universidá d'Uviéu entamen. La cultura, el deporte y l'ociu entemécense pa facilitar la llegada de los estudiantes estranxeros.