template-browser-not-supported

Por qué elegirnos

Por qué escoyenos

La Universidá d'Uviéu representa un destinu d'escelencia pa estudiantes y investigadores. Nos sos más de cuatro sieglos de vida llevantóse como una institución académica de referencia en distintes disciplines y destacó por impartir una docencia de calidá por una investigación de vanguardia. Dende 2009 cuenta col sellu de Campus d'Escelencia Internacional.

La so sólida ufierta académica atrái cada añu más d'un millar d'estudiantes y investigadores internacionales, qu'estrechen los llazos de la nuestra institución colos centros d'investigación de mayor prestixu nel mundu. L'enclín hacia la internacionalización ye claru, entá más, nos estudios de doctoráu. Más del 14% d'estos alumnos vienen de fuera d'España. Llatinoamérica y el Caribe y la Unión Europea son los dos principales focos emisores d'esti alumnáu.

Una educación internacional de calidá

L'amplia ufierta académica de la institución asturiana vese incrementada con una serie de programes destinaos a estudiantes internacionales y a españoles que deseen tener una educación internacional de calidá; al disponer de graos billingües, másteres internacionales, másteres Erasmus Mundus y dobles graos (Alministración y Dirección d'Empreses y Derechu, Física y Matemátiques, y Inxeniería Civil y de los Recursos Mineros y Enerxéticos), amás d’una amplia ufierta académica d'asignatures de grau y máster n'inglés.

Esta ufierta arriquezse con un ampliu catálogu de servicios, qu'inclúi un cientu d'actividaes complementaries, como la Estensión Universitaria, onde l'estudiante puede tomar parte d'aules y cursos de temática variada. Nesti sentíu ye reseñable’l papel de La Casa de les Llingües, qu'ufre por un preciu bien competitivu cursos d'una docena de llingües, incluyendo dellos niveles de Cursos d'Español pa Estranxeros. Peles sos aules pasen cada añu ente 500 y 800 estudiantes estranxeros que se quieren formar en llingua española, ente otros idiomes. Esti espaciu actúa como focu d'atracción del estudiantáu de fuera de les nuestres fronteres. Del total d'estudiantes qu'estudien español en La Casa de les Llingües, casi la metá (el 42%) ye estadounidense. Quien tuvo ocasión de pasar per La Casa guarda una recuerdu imborrable de la rexón y conviértese de la mesma forma nel meyor embaxador de la universidá asturiana.

Los trámites, más fáciles

Coles mires de facilitar los trámites llegales y académicos y ayudar al alumnáu estranxero nel so procesu d'adaptación, la Universidá d'Uviéu pon a la so disposición una rede de servicios y asesoramientu que-yos va permitir resolver de manera áxil toles duldes. Al traviés de la Oficina d'Atención Internacional, los estudiantes de fuera de les nuestres fronteres van consiguir tola información y sofitu necesarios pa completar los trámites llegales y académicos y pa llevar a cabu xestiones imprescindibles, como abrir una cuenta bancaria o estudiar les distintes opciones d'agospiu. Los futuros alumnos y alumnes de la Universidá d'Uviéu van poder planiar el so viaxe con antelación y disponer de tola información que precisen antes de llegar a Asturies.

L'ayuda nes primeres selmanes de la estancia tamién va llegar polos mesmos compañeros. El programa a-dUO pon en contactu al nuevu alumnu con un estudiante local del so mesmu campus, que lu va dirixir nes sos primeres selmanes n'Asturies. Los estudiantes estranxeros van tener amás a la so disposición una amplia ufierta d'actividaes culturales, deportives y d'ociu promovíes pola Universidá o poles asociaciones estudiantiles. El Serviciu de Deportes facilita al estudiante la práctica de tou tipu d'actividaes, dende'l fútbol al senderismu, pasando pela natación o’l baloncestu.

Un entornu natural privilexáu

La Universidá d'Uviéu ye unu de los motores de progresu económicu, social y cultural de la sociedá asturiana, una rexón que cunta con unu de los índices de calidá de vida más altos de toa España. La institución académica atópase nel centru d'Asturies, una zona con un entornu natural privilexáu, arrodiáu de playes y montes. Cerca d'un terciu del territoriu asturianu ta declaráu espaciu natural protexíu d'especial interés. Cinco zones gocen de la distinción de la Unesco Reserva de la Biosfera. La calidá de les sos más de 200 playes tamién supón un valor añedíu pa los visitantes que s'alleguen cada añu hasta'l Principáu.

El so patrimoniu histórico y artístico dota a la comunidá autónoma d'un curiosu extra pal estudiantáu, profesoráu, y personal d'investigación y d'alministración y servicios que trabayen na Universidá d'Uviéu. Mui cerca del Edificiu Históricu, una bona edificación del sieglu XVI asitiada n'Uviéu, atópense los monumentos del arte Prerrománicu asturianu, declaráu Patrimoniu de la Humanidá pola Unesco. Igualmente merecedor d'esta distinción ye l'arte rupestre paleolíticu del Norte d'España, qu'inclúi cinco cueves asturianes d'enorme relevancia internacional. Amás, la rexón tien equipamientos culturales de primer nivel como'l Muséu de Belles Artes y el Teatru Campoamor (Uviéu), Llaboral Ciudá de la Cultura (Xixón) o'l Centru Internacional Oscar Niemeyer (Avilés).

Los Premios Princesa d’Asturies

La cultura, que trescala tola vida universitaria, ta tamién bien presente na comunidá autónoma. La rexón ye bien conocida fuera de les nuestres fronteres polos Premios Princesa d'Asturies, que cada añu traen hasta la comunidá autónoma y tamién hasta la Universidá d'Uviéu les personalidaes más destacaes de les Artes, el Deporte, la Comunicación, les Ciencies Sociales, la Investigación o la Concordia.

Campus verdes

Los campus de la universidá, con 53 edificios n'Uviéu, Xixón y Mieres, tán arrodiaos de naturaleza. Ello ye que casi la metá del espaciu de los campus ye zona verde. La universidá cunta con un Vicerrectoráu de Sostenibilidá, Movilidá y Mediu Ambiente que trabaya pa consiguir la máxima eficiencia nun entornu lo más sostenible posible.

Uviéu, la capital y centru políticu y alministrativu de la rexón, tien na arquitectura, tanto histórica como contemporánea, unu de los sos elementos más valiosos. Pela so parte, Xixón, la ciudá con mayor númberu d'habitantes d'Asturies, ye una localidá abierta, con playes y zones verdes que-y confieren un atractivu especial. Tamién Mieres cunta con un modernu campus universitariu. L'apuesta de futuru d'esta localidá, de tradición minera, ta fuertemente lligada a la investigación tecnolóxica.

Embaxada pa l'atracción del talentu internacional

La localización d'Asturies, ente los montes del Cordal y la mar Cantábrica, y el so pasáu históricu, bien lligáu a los fenómenos migratorios, asitien la Universidá d'Uviéu nuna plataforma privilexada pa la conexón d'Asturies con España, con Europa y, bien especialmente, con América. Los centros asturianos repartíos pel continente americanu actúen como la meyor embaxada d'atracción del talentu internacional.

Amás, Asturies dispón d'un cientu d’atractivos que convierten la comunidá autónoma, cola so universidá al frente, nun destinu privilexáu pa la movilidá académica internacional.