Por qué escoyenos

La Universidá d’Uviéu ye un destín d’escelencia pa estudiantes ya investigadores. Nos sos más de cuatro sieglos de vida asitióse como una institución académica de referencia en dixebraes disciplines y distinguióse por impartir una docencia calidable y desendolcar una investigación de vanguardia. Dende 2009, cunta col cuñu de Campus d’Escelencia Internacional.

La so sólida ufierta académica fai que vengan cada añu más d'un millar d'estudiantes ya investigadores internacionales, qu'enanchen la xuntura de la nuesa institución colos centros d'investigación de mayor prestixu nel mundu. La Universidá d'Uviéu ye ún de los motores de progresu económicu, social y cultural de la sociedá asturiana, una comunidá que cunta con ún de los índices de calidá de vida más altos de toa España.

"Nos sos más de cuatro sieglos d'historia, la Universidá d'Uviéu distinguióse por impartir una docencia calidable y desendolcar una investigación de vanguardia".

Asturies ufierta al visitante un llugar privilexáu onde vivir, con un bayurosu patrimoniu históricu, cultural y natural. La comunidá ta considerada una de les más segures del país y caltién un equilibriu esceicional ente la vida urbana y los espectaculares paisaxes naturales que s'alluguen per tol territoriu.

El calter de los asturianos ye abiertu y acoyedor y les comodidaes de la vida diaria inclúin les distancies curties pa treslladase d'un llugar a otru, una rede de servicios públicos amplia y calidable y una ufierta d'ociu y cultura fonda y prestosa pa toos.