La Universidá d'Uviéu fixo pública güei la primer llista d'estudiantes almitíos en graos con llende de places. Los alumnos almitíos tendrán de formalizar agora la so matrícula del 17 al 25 de xunetu. Aquellos estudiantes nun formalicen la matrícula van dexar la plaza llibre y va correr la llista d'axudicaciones. La institución académica recuerda la obligación d'anovar la solicitú para la llista d'espera para aquellos estudiantes que nun llograren plaza en nenguna titulación o que nun se matricularon de la plaza asignada. El periodu de reclamaciones tamién va tar abiertu dende'l 17 al 25 de xunetu. El 27 de xunetu publicará la segunda llista d'almitíos y el 23 d'agostu, la tercer axudicación de places.

Les notes de corte d'esta primer axudicación son provisionales, yá que, a midida que queden places llibres, dirán cubriéndose con estudiantes en llista d'espera. Nesta primer fase, los estudios de grau con nota d'accesu más alta son: el doble grau n'Inxeniería Informática del Software y Matemátiques (13,348), Medicina (13,300), el doble grau en Matemátiques y Física (13,264 Opción A y 13,284 Opción B) y Odontoloxía (13,100).