Los profesores de la Universidá d'Uviéu puntúen con un sobresaliente la ufierta formativa que reciben de la institución académica. El plan de formación ufierta mientres el presente añu académicu un total de 97 cursos con hasta 2.395 places para'l personal docente ya investigador de la universidá. Esta propuesta de formación continua del profesoráu esperimentó una medría relevante ente los cursos 2021-2022 y 2022-2023, superior al 30%.

Pedro Alonso, Vicerrector de Polítiques de Profesoráu de la Universidá d'Uviéu, sorraya que ye xuna obligación de la institución académica caltener al día les conocencies de la so plantiya de personal docente ya investigador. Con esti propósitu, l'Institutu d'Investigación ya Innovación Educativa (INIE), que diseña y desenvuelve la ufierta formativa de la institución, ellabora cada añu un ambiciosu plan qu'inclúi xuna amplia variedá de disciplines pa la formación inicial del profesoráu más nuevu, pa dotar al personal de nueves estratexes docentes ya investigadores o p'amontar les sos competencies dixitales. “Tamos bien satisfechos coles resultancies que tamos llogrando y, bien especialmente, cola respuesta que nos dan los nuesos profesores. La nota media de les encuestes de prestu ye bien alta, percima del 9”, destaca.

El Vicerrectorado de Polítiques de Profesoráu, al traviés del INIE, realizó un esfuerzu esti últimu cursu p'amontar la ufierta formativa a los docentes. Lourdes Villalustre, directora del institutu, esplica que l'apueste de la Universidá d'Uviéu ye bien diversa. El profesoráu puede actualizar conocencies en cuatro bloques bien amplios. El primeru ye'l programa de formación inicial, empobináu escontra la profesionalización del profesoráu novel en trés árees: docencia, investigación ya innovación. El segundu ye'l programa de formación n'estratexes docentes ya investigadores, que pretende dar respuesta a les necesidaes del personal docente ya investigador pa contribuyir a la meyora de la calidá de la docencia universitaria por aciu la formación en nueves metodoloxíes docentes como flipped classroom, design thinking o aprendizaxe basáu en problemes, ente otres. Inclúyese tamién equí la ufierta de cursos del Institutu dientro del Programa de Formación del Grupu 9 d'Universidaes (G-9). El terceru ye'l programa de formación en competencies dixitales, empobináu a potenciar el tresformamientu educativu al traviés d'una ufierta empuesta a integrar la intelixencia artificial nes aules por aciu la creación de chatbot intelixentes o la esplotación de les analítiques d'aprendizaxe pa ufiertar una enseñanza más personalizada. Y el cuartu y postreru ye'l programa de microformación, escurríu al traviés de seminarios, webinarios y talleres, con un marcáu calter prácticu. Nél, desenvuélvense aquellos aspeutos más específicos, enfocaos a promover la investigación y la so tresferencia, según otros relativos a la regulación emocional del profesoráu o l'atención a la diversidá de xéneru nes aules. 

El númberu tantu de los cursos como de les places ufiertaes esperimentó un aumentu bien importante nos postreros dos años académicos. Asina, nel 2021-2022, la universidá ufiertaba 74 cursos con 1.740 places de les que pudieron beneficiase casi 2000 docentes. Nel 2022-2023, la propuesta amontóse hasta los 97 cursos y 2.395 places. Solo mientres el primer semestre casi 1.200 docentes de la universidá recibieron formación per parte del INIE.

El INIE collabora tamién col Vicerrectorado de Sostenibilidá, Movilidá y Mediu Ambiente y la Facultá de Formación de Profesoráu y Educación pal diseñu y puesta marcha d'una nueva aula flexible que pueda afaese a distintes dinámiques o la creación d'una aula ecoeficiente ya Intelixente, que se va allugar na Facultá de Formación de Profesoráu y Educación, y que va abrir el camín pa la implementación d'estes aules nos distintos campus que conformen la universidá asturiana.