Noticias

  • L'asturianu Emilio Martínez Pañeda, doctor pola Universidá d'Uviéu, llogra'l premiu al meyor inxenieru mozu del Reinu Uníu

    19 de Xunetu 2021

    Martínez Pañeda, profesor universitariu nel Imperial College de Londres, recibe'l RAEng Engineers Trust Young Engineer of the Year | El galardón, otorgáu pola Real Academia d'Inxeniería británica, ta dotáu con 3.000 llibres y foi apurríu nun actu presidíu pola princesa Ana | "La formación que recibí na Universidá d'Uviéu foi una pilastra fundamental na mio carrera y ye en gran parte responsable d'esti ésitu", destaca l'inxenieru galardonáu

    Emilio Martínez Pañeda explica a la Princesa Real Ana los detalles de su investigación.
    Emilio Martínez Pañeda, doctor pola Universidá d'Uviéu, llogró'l premiu al meyor inxenieru mozu del Reinu Uníu, un prestixosu galardón qu'apurre cada añu la Real Academia d'Inxeniería británica y que ta dotáu con 3.000 llibres. La ceremonia d'entrega de premios tuvo presidida pola princesa Ana y tuvo llugar n'una visita al Thames Tideway, el nuevu sistema de túneles y alcantarielles de Londres, una de les mayores obres d'inxeniería d'Europa. Martínez Pañeda compartió'l premiu con otros cuatro nuevos inxenieros.
     
    Emilio Martínez Pañeda ye profesor universitariu nel Imperial College de Londres, onde lidera'l grupu d'investigación en Mecánica de Materiales. El premiu reconoz les investigaciones pioneres mundiales que Martínez-Pañeda lideró nes árees de mecánica de sólidos ya inxeniería de materiales. En particular, el xuráu destacó los modelos computacionales desenvueltos pol inxenieru asturianu y el so grupu d'investigación, que dexen predicir el fallu de componentes y estructures metáliques pol escomiu, la so esposición al hidróxenu o la so esposición a cargues cícliques. Estos modelos tán siendo utilizaos na industria eólico para predicir la vida de les turbinas eóliques, y nel campu del hidróxenu para desenvolver componentes que dexen almacenar y tresportar hidróxenu de forma segura.
     
    Emilio Martínez Pañeda, Inxenieru Industrial pola Universidá d'Uviéu, desenvolvió'l so doctoráu nel Departamentu de Construcción ya Inxeniería de Fabricación de la Escuela Politécnica de Xixón. El so trabayu de tesis tuvo supervisáu pola caderalga Cuadonga Betegón y financiáu pol Ministeriu d'Economía y Competitividá español, la Universidá d'Uviéu y el Conseyu d'Investigación de Dinamarca. 
     
    "La formación que recibí na Universidá d'Uviéu foi una pilastra fundamental na mio carrera profesional y ye en gran parte responsable d'esti ésitu. Les carreres d'inxeniería n'España son d'abonda duración y dificultá, lo que dexa sentar unes bases matemátiques, físiques y ingenieriles que son fundamentales para resolver munchos de los problemes a los qu'enfrentamos acaldía nel mio grupu d'investigación: dende'l desenvolvimientu d'estructures segures para l'almacenamientu d'hidróxenu hasta la predicción de la vida en serviciu de les turbinas eóliques", destaca l'inxenieru galardonáu. "Son problemes multidisciplinares que riquen d'una formación xeneralista como la que recibí cuando cursé Inxeniería Industrial, y coles mesmes, d'una formación especializada en mecánica de materiales, como la que recibí mientres la mio tesis doctoral", añede.
     
    Na actualidá, Emilio Martínez Pañeda trabaya como profesor universitariu nel Imperial College de Londres, una universidá clasificada ente les 10 meyores del mundu (8ª nel 2020 QS World University Rankings, 10ª nel 2020 Times Higher Education World Rankings).
     

    Imaxes:



Buscar