Fomentar la investigación, tantu básica como aplicada, espublizar les sos resultancies y ameyorar la formación nel campu de los servicios sociales son los oxetivos de la nueva cátedra que punxeron en marcha güei la Universidá d'Uviéu y la Conseyería de Derechos Sociales y Bienestar del Principáu. Con esta Cátedra d'Innovación Social-Retos del Bienestar, dambes instituciones enllanten un marcu estable de cooperación ya intercambiu para la meyora permanente del sistema asturianu de servicios sociales. La cátedra cunta con una inversión de 150.000 euros, financiaos con cargu al Plan de Recuperación, Tresformamientu y Resiliencia, fondos Next Generation de la Unión Europea. 

El conveniu de constitución de la cátedra foi robláu esta tarde pola conseyera de Derechos Sociales y Bienestar, Melania Álvarez, y el rector de la Universidá d'Uviéu, Ignacio Villaverde, nun actu nel que tamién tuvieron presente Ana Fernández Zapico, directora xeneral de Planificación, Ordenación  y Adaptación al Cambéu Social, y Begoña Cueto, vicerrectora de Tresferencia y Relaciones cola Empresa de la Universidá d'Uviéu. 

La conseyera de Derechos Sociales y Bienestar, Melania Álvarez, calificó como “imprescindible” la collaboración institucional para optimizar los recursos públicos “y ufiertar una respuesta solvente, y respondida por pola evidencia, a los importantes retos sociales a los que les polítiques públiques van tener que faer frente énte'l necesariu tresformamientu del sistema”, manifestó, poniendo como exemplu esti trabayu conxuntu que van entamar el so departamentu y l'Universidá d'Uviéu.
Pela so parte, el rector de la Universidá d'Uviéu, Ignacio Villaverde, manifestó que la cátedra surde con una doble ambición, como reflexa'l so nome; per un sitiu, la innovación social, empobinada a la busca de les meyores práctiques y basada n'evidencies sólides y n'evaluaciones sistemátiques, y pol otru, los retos del bienestar, que remite a ámbitos centrales de los servicios sociales”. Amás, fixo fincapié nel papel académicu que tien de desempeñar la universidá nestes cuestiones, “buscando soluciones y adelantrándonos a los problemes que surden d'una sociedá qu'avanza a un ritmu muncho más rápido qu'antes”. 

La cátedra, que va tar dirixida por Rodolfo Gutiérrez, del Departamentu de Socioloxía, y codirigida por Javier Mato, del Departamentu d'Economía Aplicada, va abrir el so programa d'actividaes mañana, 22 de marzu, con una conferencia sobro los cuidos de llarga duración y los retos del Sistema pa l'Autonomía y l'Atención a la Dependencia (SAAD), al cargu de Vicente Marbán, profesor de la Universidá de Alcalá. Va Ser a les 11:30 hores na Facultá Xovellanos del Campus de Xixón. Amás, n'abril y en mayu celebrarán dos xornaes de trabayu, la primera d'elles sobre la repartida de competencies y el financiamientu de les polítiques sociales y la segunda, sobro innovación en servicios sociales.