La Universidá d'Uviéu, de la mano del Arquivu Históricu d'Hunosa, rinde tributu a la memoria femenina de la minería asturiana al traviés d'una esposición fotográfica que va poder visitase nel claustru altu del Edificiu Históricu hasta'l próximu 30 de xunu. L'amuesa ye un percorríu pola presencia y contribución de les muyeres al sector de la minería.

Tal que espliquen dende l'Arquivu Históricu d'Hunosa, “dende los entamos de l'actividá minera n'Asturies, la presencia de la muyer foi una constante”. La esposición plantega, al traviés d'imaxes del propiu arquivu y d'otres vencíes pol Muséu del Pueblu d'Asturies y de ciudadanos particulares como Angelita Cueva, un acercamientu a una llarga hestoria que saca a la lluz uno llabor calláu, alloñada de la épica qu'arrodia'l trabayu de los mineros y ayena, hasta fai bien pocos años, a cualquier reconocencia. 

La esposición, inaugurada esta tarde pola vicerrectora d'Estensión Universitaria y Proyección Cultural, Pilar García Cuetos, y en presencia del director de Comunicación y Relaciones Institucionales d'HUNOSA, Gustavo Pañeda, reivindica “el papel de la muyer na industria del carbón, xuna llabor discretu y calláu a lo llargo de los años, pero trascendente”. 

La vicerrectora Pilar García Cuetos señaló que “esta amuesa asítianos énte imaxes de guapura descarnada, d'una carga documental y testimonial tan potente que, nesti casu, como en nengún otru, podemos dicir que sobren les palabres”, y añedió que “esta esposición nun axunta solo xuna colección de fotografíes antigües, sinón que documenta minuciosamente el trabayu, la marxinación y la llucha de les muyeres nun mundu d'homes, el so trabayu duro y callao y la llongura'l camín percorríu hasta consiguir un llugar nel complexu treme de la minería”.

Pilar García Cuetos señaló que la esposición “va dexanos afayar una parte bien poco conocida de la hestoria d'Asturies, del nuesu heriedu y la nuesa cultura” y aprovechó para estimar al Arquivu Históricu d'Hunosa, en nome de la Universidá d'Uviéu, que “por aciu esta collaboración, podamos ser vehículu d'espardimientu d'esta amuesa que con tanta calidá y con tanto mimu ellaboróse”. “Al traviés d'ella, vamos ver cómo estes muyeres pioneres, esti lluchadores incansables, ocuparon un espaciu que vamos afayar ente la sorpresa y l'almiración”, esplicó.

La Universidá d'Uviéu, dientro de la so Casa Abierta y nel so compromisu col territoriu, recibe esta esposición que “trai al nuesu Edificiu Históricu les imaxes de muyeres humildes, que les sos vides trescurrieron al serviciu de los suyos, na llucha por ameyorar la so situación y llenes de valentía”, dixo la vicerrectora, qu'añedió que “nun vamos poder dexar d'almirar el so coraxe, que les llevó a reclamar el so espaciu nun oficiu y l'entereza cola qu'encararon la durez del so llabor diariu”.