La Universidá d'Uviéu incorpora l'Aula Institucional Química del Nalón de Química Circular y Sostenible, coles mires de contribuyir a la conocencia y la promoción de la I+D+i nel ámbitu de los procesos químicos circulares y sostenibles.

Esta tarde, tuvo llugar na sala de graos de la Facultá de Química la presentación del alcuerdu que dexa la creación de l'Aula Institucional Química del Nalón de Química Circular y Sostenible, na que tuvieron presente Begoña Cueto Iglesias, vicerrectora en funciones de Tresferencia y Relaciones cola Empresa de la Universidá d'Uviéu; Susana Fernández González, decana de la Facultá de Química de la Universidá d'Uviéu; Javier Fernández González, director xeneral de Química del Nalón; y Salvador Ordóñez García, director de l'Aula Institucional Química del Nalón de Química Circular y Sostenible.

L'Aula Institucional Química del Nalón va promover la celebración de xornaes d'espardimientu investigador, rellacionaes cola I+D+i de los procesos químicos circulares y sostenibles; va aguiyar el desenvolvimientu de llínees d'investigación y proyectos departamentales y va promover el talentu y l'excelencia académica nesti ámbitu.

Susana Fernández González, decana de la Facultá de Química de la Universidá d'Uviéu, manifestó que “para dar respuesta a los retos actuales a los que s'enfrenta la sociedá, la industria químico tien d'avanzar escontra una producción más sostenible na que se potencie xuna eficiencia enerxética, la reutilización de borrafes y procesos más eficientes con un menor consumu de materies primes. La industria químico ye'l mayor inversor industrial n'I+D+i y tien el potencial necesariu para participar nel tresformamientu de la economía escontra un nuevu modelu circular.”

Salvador Ordóñez García, catedráticu del Departamentu d'Inxeniería Química y Tecnoloxía del Medio Ambiente y director de l'Aula Institucional Química del Nalón de Química Circular y Sostenible, punxo en valor l'apueste de la empresa pola investigación que se realiza na Facultá de Química, col enfotu de qu'esti sofitu sirva de puntu d'alcuentru y catalizador para'l desenvolvimientu de nueves temátiques d'investigación nel campu de la química circular y sostenible ente los distintos departamentos y grupos d'investigación que formen parte de la facultá. Numberó tamién les actividaes que va realizar l'aula mientres el presente añu, ente les que destaquen la realización d'una sesión de nube d'idees sobro cinco grandes retos d'investigación plantegaos pola empresa (25 de xunu), y un simposio científicu que va cuntar con una figura científica mundial de primer nivel nel campu de la Química Sostenible, que se va celebrar nel últimu trimestre del añu. 

Javier Fernández González, director xeneral de Química del Nalón declaró que “dende los años 50, confiamos la nuesa crecedera a la innovación y a l'atracción de talentu innovador. Cola Aula Institucional Química del Nalón de química circular y sostenible damos un pasu más, tanto na profesionalización de la nuesa estratexa d'innovación como na vinculación col territoriu, per mediu d'esti alcuerdu cola Universidá d'Uviéu y de la so Facultá de Química”. “Col centru d'I+D+i empresarial Nalón Anueva, el Conseyu Científicu Asesor y, agora l'aula, Química del Nalón dispon d'un ecosistema propiu d'innovación pa siguir encetando con ésitu los retos y les oportunidaes de crecedera y diversificación de los nuesos negocios, con un enfoque amestáu al tresformamientu dixital y la sostenibilidá”, concluyó.