La Universidá d'Uviéu desenvolvió güei una xornada abierta para treslladar a la sociedá asturiana la pujanza de la investigación y tresferencia del Campus de Mieres. La xornada cuntó cola participación de siete institutos, centros d'investigación y entidaes, cinco cátedres y una decena de grupos d'investigación. Toos ellos allugaos nel campus d'esta cuenca minera de la institución académica asturiana.

La xornada foi inaugurada esta mañana cola participación d'Ignacio Villaverde, rector de la Universidá d'Uviéu; Borja Sánchez, conseyeru de Ciencia, Empreses, Formación y Empléu; Manuel Ángel Álvarez, alcalde de Mieres, y Ángel Martín, director de la Escuela Politécnica de Mieres. Les autoridaes tuvieron ocasión de percorrer distintos estands para conocer en fondura los trabayos d'investigación desenvueltos nel campus. 

Ignacio Villaverde destacó na so intervención que la Universidá d'Uviéu debe pivotar sobro trés exes fundamentales: docencia, investigación, pero tamién tresferencia de la conocencia escontra la sociedá y escontra la empresa. “El campus de Mieres cumple a la perfección esta triple función”, destacó. El rector punxo como exemplu del bon funcionamientu del campus el fechu, cada vez más frecuente, de qu'empreses multinacionales alleguen a Mieres en busca de collaboraciones, proyectos d'investigación conxuntos o profesionales cualificaos en sectores rellacionaos coles materies primes, los recursos naturales o la enerxía.

Villaverde, que tuvo palabres d'agradecimientu escontra l'equipu directivu del campus, fixo fincapié na necesidá, plantegada yá nos planes estratéxicos, de dotar de personalidá propia al Campus de Mieres. El rector amosóse satisfechu coles resultancies llograes que converten a Mieres nun “gran focu d'interés amestáu a los recursos natural y medioambiental, la so ordenación y articulación territorial, les enerxíes, los materiales y los sos nuevos usos y rendimientos, y el diseñu y construcción de grandes infraestructures civiles. 

Ángel Martín, director de la Escuela Politécnica de Mieres, sorrayó, pela so parte, la importancia de xornaes como la celebrada güei, que dexen tresmitir a la sociedá xeneral ysobremanera, a l'asturiana “les importantes meyores d'investigación y tresferencia, que se tán llevando a cabu nel nuesu campus”.  “Somos conscientes de la gran inversión que nuesa sociedá realiza en nós, nel nuesu campus polo xeneral, y pollo buscamos qu'esta mesma sociedá sepa cuálos son los frutos recoyíos, los llogros llograos. Entendemos que tollo va repercutir nuna sociedá más xusta y sostenible”, apuntó. 

El director de la escuela esplicó que la investigación desenvuelta nel campus mierense allíniase, en gran parte, colos Oxetivos de Desenvolvimientu Sostenible, de l'Axenda 2023 de Naciones Xuníes y, más específicamente, colos oxetivos rellacionaos con: Agua llimpio y saneamientu; Enerxía algamadiza y non contaminante; Industria, innovación ya infraestructura; Ciudaes y comunidaes sostenibles; Producción y consumu responsables; Acción pol clima; y Vida d'ecosistemes terrestres.

La xornada cuntó cola participación de los distintos institutos, centros y grupos d'investigación, amás de les cátedres y otres entidaes. Tuvieron presentes:

•    Instituto de Recursos Naturales y Ordenación del Territorio (INDUROT).  
•    Institutito Mixto de Investigación en Biodiversidad (IMIB).
•    Fundación Asturiana de la Energía (Faen).
•    Centro de Cooperación y Desarrollo Territorial de la Universidad de Oviedo (CECODET).
•    Centro Universitario Asturias Raw Materials.
•    Centro Universitario de Investigación y Desarrollo del Agua (CUIDA).
•    Centro de Computación Científica C3.
•    Cátedra Hunosa. 
•    Cátedra Excade. 
•    Cátedra Cambio Climático.
•    Catedra Pasek Smart 20.
•    Cátedra Cogersa, recientemente incorporada al campus.
•    Grupo GIPI Ingeniería de Proyectos e Ingeniería Sostenible.
•    Grupo GEOGRAPH Geomática y Computación Gráfica. 
•    Grupo DyMast y OFF Tech. 
•    Grupo Din Rock Comportamiento Dinámico de Terreno. 
•    Grupo Producción Vegetal.
•    Grupo NB-Geo.
•    Grupo CEGE de investigación en Ingeniería Civil, Ambiental y Geomática.
•    Grupo Citetrans. 
•    Grupo Fórmula Windy. 
•    Grupo The Uniovi Footbrigde.