La comisión de siguimientu de la Cátedra Cogersa d'Economía Circular aprobó güei, nel marcu d'un nuevu conveniu ente'l consorciu de borrafes y l'Universidá d'Uviéu, el plan añal de trabayu pa esa entidá, según el treslláu de la see al campus de Mieres.

Coles mesmes, designóse como nuevu director al profesor José Luis Viesca, catedráticu de la área d'Inxeniería Mecánica, inxenieru de Mines, investigador coautor en más de 100 publicaciones científiques y subdireutor de la Escuela Politécnica de Mieres mientres nueve años.

Plan d'actividaes. Enfoque estratéxicu

La nueva dirección de la Cátedra trazó un plan d'actividaes pa 2024 que s'allinia cola Estratexa d'Economía Circular del Principáu y nel que s'incide, ente otres prioridaes, na sensibilización y formación, por aciu la web catedracogersa.com, les redes sociales, los boletinos informativos y otres actividaes públiques (esposiciones, observatoriu de la circularidá, …) nes que compartir información y conocencia. 

Dientro del compromisu cola I+D+i y cola tresferencia de conocencia a la redolada empresarial ya investigador, siguirán otorgándose los premios Cátedra Cogersa al meyor trabayo fin de máster y meyor tesis doctoral; van concedese beques pa trés estudiantes de la UO en llabores d'investigación sobro circularidá; va fomentase la participación en congresos y alcuentros, y va entamase xornaes técniques o seminarios que fomenten l'alderique y la reflexón. 

La dirección de la Cátedra propónse impulsar midíes de prevención de borrafes y d'implantación de la recoyida separada de borrafes en tolos espacios físicos y ámbitos de l'actividá universitaria. 

No relativo a aliances estratéxiques va caltenese la participación na Rede de Cátedres Universitaries de Sostenibilidá (formada por 22 cátedres de toa España) y van buscase collaboraciones col sector empresarial de la construcción.

Nueva see permanente

La comisión aprobó tamién el treslláu de la so see permanente al edificiu d'Investigación del Campus de Mieres, por razones de índole estratéxica y cuidao que esta see universitaria ta especializada n'Inxeniería y Xestión de los Recursos Naturales. Amás, tamién ende allúgase l'HUB de Recursos Naturales y Materies Primes al que ta adscritu la Cátedra Cogersa. La cercanía del HUB va ayudar al establecimientu d'aliances que contribuyan a promover la economía circular y algamar dalgunos de los oxetivos estratéxicos de la rexón.