El Conseyu de l'Alianza INGENIUM, integráu polos rectores y rectores de les diez universidaes miembru, dio un impulsu importante para'l desenvolvimientu de les nueves titulaciones del consorciu, na xunta celebrada na Universidá de Munster (Irlanda), que tuvo liderada por Ignacio Villaverde, rector de la Universidá d'Uviéu y presidente del Conseyu de l'Alianza INGENIUM.

Los órganos directivos d'esti consorciu de diez universidaes europees –el conseyu de l'alianza y el comité executivu—caltuvieron un intensu programa de trabayu na ciudá de Cork con ocasión de la conmemoración del primer aniversariu de l'alianza qu'echó a andar na Universidá d'Uviéu fai agora trelce meses. 

La delegación institucional de la Universidá d'Uviéu, que coordina esti consorciu européu, tuvo encabezada pol rector Ignacio Villaverde; Daniel Santos, vicerrector de Internacionalización y presidente del Comité Executivu, y Ana Isabel Álvarez González, y Agustín Nieto, directora y coordinador de l'alianza, respectivamente, ente otres autoridaes académiques. 

El conseyu de l'alianza encamentó al comité executivu avanzar en cuatro cuestiones básiques pal ésitu de l'alianza. Asina, de cara a la nueva xunta que va tener llugar n'ochobre en Pescara, l'executivu tendrá de presentar un plan de implementación de titulaciones compartíes y microcredenciales, allanar el procesu pa la constitución de la entidá llegal de l'alianza, diseñar una estratexa conxunta de comunicación y marketing y redactar una guía de bones práctiques qu'implique non solo a les diez universidaes consorciadas, sinón tamién a los sos socios. Los órganos directivos de l'alianza dieron tamién el vistu bonu al informe financieru de 2023 y al presupuestu de 2024. 

Nel so discursu de bienvenida como presidente del conseyu, Ignacio Villaverde destacó'l poder tresformador de INGENIUM. “Crear el nuesu campus interuniversitario y construyir una ufierta educativa conxunta con programes abiertos y flexibles son los nuesos compromisos centrales pa esti periodu inicial de financiamientu”, destacó Villaverde. “Tenemos qu'impulsar la movilidá y, coles mesmes, crear redolaes d'aprendizaxe entamadores, inclusivos y sostenibles que ruempan los silos ente educación, investigación ya innovación”. Con esti propósitu, la fueya de ruta del consorciu pasa por establecer, primero, dobles titulaciones ente dos de les instituciones pa pasar dempués a les titulaciones compartíes. Acordies con el mandatu de la Comisión Europea, al términu d'esti primer periodu de financiamientu, en 2026, l'alianza tien de tener operatives diez titulaciones. 

Daniel Santos, en calidá de presidente del Comité Executivu de INGENIUM, presentó en Cork un informe de resultancies d'esti primer añu. Santos fixo fincapié en que nestos trelce meses llográronse meyores notables pa desenvolver la estructura necesaria, el músculu, que va dexar nesti segundu añu ver yá los primeros frutos de l'alianza. “Trabayemos enforma en 2023. Sentemos les bases de INGENIUM, creemos les pilastres pa construyir una alianza ambiciosa, sostenible y diversa. Tamién constituyimos los órganos de gobiernu, que trabayaron a plenu rendimientu, y asistimos a les primeres iniciatives surdíes de l'alianza: los Ten Days INGENIUM y la primer convocatoria conxunta de grupos d'investigación”, fixo fincapié. “D'equí p'arriba, coles bases firmes, tenemos de centrar toos los nuesos esfuerzos en xenerar impactu y tresformar les nueses idees n'iniciatives tanxibles que lleguen a tola comunidá universitaria”, añedió.

Ten Days INGENIUM

Les xuntes del conseyu y el comité executivu de l'alianza coincidieron cola celebración de los Ten Days INGENIUM, xuna iniciativa de movilidá estudiantil que dexa al alumnáu de les distintes universidaes compartir esperiencies. Los Ten Days INGENIUM desenvolviéronse en Creta y, agora, en Cork. Ana Isabel Álvarez, directora de INGENIUM, dio la bienvenida a los estudiantes, pieza fundamental por que la alianza llegue a bon términu. Álvarez informó a los asistentes de que yá s'implementaron alcuerdos multillaterales de movilidá Erasmus+, que van facilitar les movilidaes ente aliances y tamién van otorgar financiamientu adicional na mayoría de los casos”. “La movilidá, como impulsor de la conciencia intercultural, va contribuyir a que la nuesa comunidá INGENIUM sía muncho más rica, non solo en conocencia y cultura, sinón tamién en valores de ciudadanía europea”, concluyó. Per parte de la Universidá d'Uviéu asistieron a esta escuela d'iviernu los alumnos Óscar Díaz Márquez, Julio Menéndez Caru, Manuel Porrón Álvarez, Raquel Castañón González y Pablo García-Ovies Pérez, mentorizados pol profesor de la Universidá d'Uviéu Javier Fernández Río.