Dende la publicación de la Disposición adicional 52º del testu refundíu de la Llei Xeneral de la Seguridá Social, aprobáu pol Real Decretu Lexislativu 8/2015, de 30 d'ochobre, titulada «Inclusión nel sistema de Seguridá Social d'alumnos que realicen práctiques formatives o práctiques académiques esternes incluyíes en programes de formación», y magar que teníen de ser les alministraciones y empreses nes que se realicen estes práctiques les qu'asumieren estes xeres, les universidaes españoles realicemos un ingente esfuerzu para la so aplicación buscando siempres l'interés del nuesu estudiantáu.

Énte la so efectiva entrada a valir el pasáu 1 de xineru de 2024, la Conferencia de Rectores y Rectores de les Universidaes Españoles quier faer constar la so estrema esmolición énte les siguientes circunstancies:

• A fecha de güei, la Tesorería Xeneral de la Seguridá Social (TGSS) sigue ensin unviar a les Universidaes instrucciones clares, precises y estables sobro cómo implementar les altes y baxes na Seguridá Social de los estudiantes en práctiques, sía como quier la so casuística y situación personal.
• Munches de les consultes de duldes realizaes a la TGSS sobro los casos problemáticos que se prevíen y aquellos otros que fueron surdiendo mientres esti primer mes d'aplicación siguen ensin tener contestación per escritu.
• En llugar de disponer d'estes instrucciones con certidumbre, treslládensenos instrucciones contradictories, como les recibíes en relación colos estudiantes en movilidá internacional o como la recibida'l día 1 de febreru (4ª ampliación del criteriu 11/2023) pola que se modificar aspeutos sustanciales de les instrucciones recibíes con anterioridá no que se refier a les práctiques extracurriculares.
• Esta pauta de desinformación, improvisación y cambéu sorpresivu de les sos indicaciones per parte de la TGSS ta faciendo prácticamente imposible que les universidaes podamos articular de manera correcta los nuesos procedimientos; tantu ye asina que nos tán llegando perabondoses consultes d'estudiantes pa que la so resolvimientu les universidaes nun disponemos d'una información correcta.
• A partir d'esti momentu, pal resolvimientu d'estes consultes qu'entepasen de la nuesa conocencia y ámbitu de funcionamientu, les universidaes vamos encamentar al nuesu estudiantáu, a les empreses y a les entidaes comenenciudes que se dirixan directamente a la TGSS pa formulales.
• Por más que les universidaes asumiéramos nesta cuestión xuna responsabilidá que primeramente la norma nun nos atribuyía, la situación ye de tanta incertidume y gravedá que tarrecemos que'l sistema de práctiques formatives, esencial pa la formación y l'empleabilidá del nuesu estudiantáu, pueda colapsar infligiendo graves perxuicios al mesmu. Ello ye que énte'l desconciertu que se ta produciendo son munches les empreses que tán retirando la so ufierta de práctiques formatives, inclusive cuando la Universidá asume la so xestión económica y alministrativa.
• Énte estos fechos, les universidaes nun podemos responsabilizanos de los erros o fallos que se cometan o de les consecuencies qu'esta situación pueda acarretar.

Por tollo, consideramos que nesti estáu de coses ye imposible realizar una correcta aplicación de la mentada Disposición Adicional, y énte el riesgu de paralización de los programes de práctiques formatives nes universidaes españoles, riquimos que s'esixan les responsabilidaes que correspuendan a los organismos implicaos y adóptense de forma urxente cuantes midíes sían necesaries per parte de los Ministerios concerníos pa garantizar el fayadizu cumplimientu d'esta norma, velando siempres pol lexítimu interés y los derechos del estudiantáu universitariu.