La Universidá d'Uviéu vuelve la mirada escontra América con una esposición de la obra gráfica de mediu centenar de grabadistas de 14 países del continente. La sesta edición d'Axuntadura Gráfica Internacional Contemporanea va poder visitase ente'l 12 d'avientu y el 21 de xineru na Sala d'Esposiciones del Edificiu Históricu de la universidá asturiana. L'amuesa va ser inaugurada esta tarde, a les 19:00 hores, por María Pilar García Cuetos, vicerrectora d'Estensión Universitaria y Proyección Cultural, y Fermín Santos, promotor de la iniciativa y director d'Ediciones Patanegra. 

García Cuetos destaca qu'esta nueva edición d'Axuntadura concibióse p'axuntar una parte de la rica y diversa producción” de la obra gráfica del continente americanu. La vicerrectora sorraya qu'Axuntadura, consolidada yá como un espaciu d'alcuentru d'artistes grabadores vivos”, axunta, nesta ocasión, nel Edificiu Históricu, a un puñáu de ceadores que sinteticen na so diversidá'l cosmos de los distintos procesos gráficos conocíos y tienen de mancomún la so vinculación a España, por distintes circunstancies y motivos. “Nesta amuesa, ceadores y creadores avérennos a les sos cosmovisiones, a les sos propuestes y a les sos busques. Esa diversidá, esa riqueza de perspectives, técniques y plasmaciones, constitúi'l curiosu d'Axuntadura”, añedi la vicerrectora. 

La selección de Fermín Santos regálanos, a xuiciu de García Cuetos, “un discursu espositivu que caltien xuna corriente de fondu, un filo conductor que nos conduz dende la escala de grises a el color vibrante, de lo onírico a lo simbólico y reivindicativo, ensin dexar de llau l'heriedu de les cultures diverses qu'encimentaron l'actual axuntadura que ye, tamién, el continente americanu y l'esmolición pola interacción con Europa y cola encruciada común de la Humanidá”.

Nun tiempu convulso nel que la crispadura y la polarización paecen imponese, “Axuntadura devuélvenos al diálogu, a la concordia y a la reflexón sobro'l nuesu mundu, sobro les nueses creencies y sobro los retos del nuesu futuru, sobro les esperances y les decepciones”, indica la responsable d'Estensión Universitaria y Proyección Cultural. “Averamos, pos, a una esposición que nos amuesa la puxante, diversa y siempres suxerente y curiosa riqueza del grabáu, que Fermín Santos supo compilar nesta formosa Axuntadura”, apunta.

Fermín Santos, director d'Ediciones Patanegra y promotor de la iniciativa al pie de Paco Mora, resalta que la gráfica americana ye “tan estensa y variada” como lo ye'l continente nel que se desenvuelve. “Por destacar daqué remarcaría la cantidá d'artistes grabadores que tien el territoriu, el so virtuosismu y la dedicación d'un gran númberu d'artistes grabadores en tolos procesos técnicos calcográficos directos ya indirectos; y no plástico, la constante referencia na obra de munchos artistes de lo propio, lo próximo, lo cultural y lo étnico”, matiza.

Axuntadura, d'acordies con el so promotor, convirtióse yá en “una numberosa escoyeta d'obra gráfica y nun importante censu d'artistes grabadores vivos contemporaneos de bien diverses procedencies” y con un repertoriu de técniques gráfiques bien variáu que representa tolos procesos gráficos conocíos. “Los artistes participantes nesta sesta edición, na so mayoría, tán bien venceyaos a la gráfica n'España; bien por ser nativos, residentes, por vinculaciones llograes primeramente o por tar próximos a la gráfica hispanu-llatinu-americana al traviés de les canales d'espardimientu na rede”, conclúi Santos. 

Información práctica

Sesta edición d'Axuntadura Gráfica Internacional Contemporanea Sala d'Esposiciones
del Edificiu Históricu de la Universidá d'Uviéu

Feches: 

Del 12 d'avientu de 2023 al 21 de xineru de 2024.

Horarios:

Del 12 al 23 d'avientu y del 2 al 21 de xineru: de llunes a vienres, de 11:00 a 14:00 hores y de 17:00 a 20:00 hores. Sábados, de 10:00 a 19:30 hores. Domingos, de 10:30 a 14:30 hores.
Del 26 al 29 d'avientu: de 11:30 a 16:30 hores.
24 y 31 d'avientu: de 10:30 a 14:30 hores.
Zarráu: 25 d'avientu, 1 y 6 de xineru.