El profesor de la Universidá d'Uviéu Luis Alfonso Díaz Secades llogró'l Premiu Salvador Cascales Lozano 2023 a la meyor tesis doctoral na categoría d'Inxeniería Naval. El so trabayu doctoral, tituláu Reaprovechamiento enerxéticu de motor diésel marín por aciu xeneradores termoeléctricos, analiza cómo amenorgar el consumu de combustible de los buques y, con ello, les emisiones de gases d'efectu invernaderu. La tesis foi dirixida polos profesores Noelia Rivera Rellán y Rubén González Rodríguez y realizada dientro del programa oficial de doctoráu n'Inxeniería Náutica, Marina y Radiollétrica Naval de la Universidá d'Uviéu.

Luis Alfonso Diaz Secades, profesor ayudante doctor del Departamentu de Ciencia y Tecnoloxía Náutica ya investigador de la Cátedra Milla de la Conocencia: Xixón Azul, destacó que “resulta tou un honor ser escoyíu pola Real Academia de Doctores d'España como'l ganador del Premiu Salvador Cascales Lozano. Esta reconocencia non solo representa la resultancia del mio trabayu, sinón tamién la dedicación y el respaldu incondicional de los mios directores de tesis y l'escepcional equipu de la Escuela Cimera de la Marina Civil de Xixón”. “La concesión d'esti importante premiu resulta un catalizador qu'impulsa'l mio compromisu para siguir investigando y compartiendo conocencia sobro'l sector marítimu, y anímame a siguir trabayando en beneficiu de la sociedá nel so conxuntu”, añedió.

Los premios Salvador Cascales Lozano, concedíos pola Real Academia de Doctores d'España (RADE) na 42 edición de los sos premios a la investigación, tán destinaos a aquelles tesis, lleíes mientres el cursu 2022-2023, calificaes con sobresaliente cum laude, que s'estremen, sobremanera, pola so excelencia científica y el so calter innovador. Los galardones de la RADE pretenden impulsar la investigación y, sobremanera, galardonar el trabayosu trabayu que supon la realización d'una tesis doctoral. Estes reconocencies cunten con un gran prestíu dada la excelencia de los trabayos presentaos, el so calter altamente competitivu y el gran númberu de candidatures qu'opten a los premios. Deciden la concesión d'estes distinciones un xuráu formáu por académicos de la institución en distintes categoríes: Humanidaes, Ciencies de la Vida y de la Salú, Ciencies Xurídiques, Ciencies Esperimentales y Tecnolóxiques.

El profesor galardonáu esplica na so tesis que'l tresporte marítimu xenera'l 2,89% de les emisiones antropogénicas totales. La mayor parte de les emisiones de gases d'efectu invernaderu del buque provienen del motor diésel. “La medría de la eficiencia del motor marín, p'amenorgar el consumu de combustible y, poro, les emisiones de gases, plantega la necesidá de realizar grandes inversiones pa llograr meyores menores. Na actualidá, la recuperación de calor residual ye xuna llínea d'investigación relevante yá que puede consiguir mayores medríes na eficiencia del motor utilizando menos recursos”, conclúi l'investigador.