La Universidá d'Uviéu sumóse a los actos de conmemoración del Día Internacional d'Eliminación de la Violencia contra la Muyer cola celebración de la mesa de diálogo “Investigación y compromisu de la Universidá d'Uviéu contra la violencia de xéneru”. Esta mesa de diálogu desenvolvióse'l vienres, 24 de payares, el día previu a la efeméride, na Capiya del Edificiu Históricu.

Participaron nel diálogu los docentes Andrea Llanu Suárez, de la Área de Ciencies de la Salú; Javier Fernández Teruelo, de la Área de Derechu Penal; M. Yolanda Fontanil, de la Área de Psicoloxía; M. Ánxeles Alcedo Rodríguez, de la Área de Psicoloxía; Melissa Cicchetti, de la Área de Filoloxía; Rosa M. Cid López, de la Área d'Hestoria Antigua; Sonia Villa Sierio, de la Área de Derechu Penal; y Soraya Calvo González, de la Área de Didáctica y Organización Escolar. L'actu institucional cuntó cola participación d'Ignacio Villaverde, rector de la Universidá d'Uviéu, y de Paz Menéndez Sebastián, directora de la Unidá d'Igualdá. Cuntó tamién cola asistencia de Humberto R. Solla, vicerrectror de Relaciones Institucionales y Coordinación.

Paz Menéndez destacó qu'esti actu tien por oxetu dar testimoniu del compromisu que la Universidá d'Uviéu tien a tolos niveles cola llucha contra la violencia de xéneru. Esti compromisu manifiéstase non solo al traviés de les persones qu'integren la universidá, sinón tamién de manera institucional. La universidá vien realizando de forma sistemática actos institucionales con ocasión del Día Internacional d'Eliminación de la Violencia contra la Muyer, pero al par tamién contribúi al financiamientu d'investigaciones nesta materia, concediendo ayudes a grupos de persones investigadores qu'estudien esta temática cola vista puesta en poder poner fin dalgún día a esta lacra social. 

L'actu institucional d'anguaño, según la directora de la Unidá d'Igualdá, pretendió visibilizar esti compromisu, dando voz a les persones que dende distintos ámbitos de conocencia (psicoloxía, ciencies de la salú, derechu, hestoria, filoloxía didáctica y organización escolar) realicen estudios sobro violencia de xéneru, especialmente los que reciben financiamientu con cargu a proyectos d'investigación. Caúna de les persones intervinientes facilitó datos sobro les resultancies de les sos investigaciones, lo que va dexar a la comunidá universitaria, pero tamién a la sociedá valorar más afechiscamente l'aportación que representa la investigación universitaria nesta materia.

Mientres l'actu, xuna alumna de la institución académica lleó tamién el manifiestu de la Rede d'Unidaes d'Igualdá de Xéneru pa la Excelencia Universitaria (RUIGEU) de la que forma parte la Universidá d'Uviéu, y el rector Ignacio Villaverde, lleó, pela so parte, el manifiestu de Crue.