La Universidá d'Uviéu acueye mientres los díes 9 y 10 de payares el XIII Alcuentru de la Rede de Servicios de Sofitu a Persones con Discapacidá na Universidá (SAPDU) que, nesta nueva edición, lleva'l lema En-REDE-ando. L'alcuentru va dexar cavilgar y poner de mancomún  les práctiques llevaes a cabu poles universidaes coles mires de sofitar y ameyorar el serviciu qu'empresten a les persones con discapacidá y/o necesidaes específiques de sofitu educativu de les universidaes españoles.

La inauguración del alcuentru tuvo llugar esta mañana nel Paraninfu del Edificiu Históricu cola presidencia del rector Ignacio Villaverde. Intervinieron tamién Alfonso López Muñiz, vicerrector d'Estudiantes; Cristina González Morán, directora xeneral d'Universidá; Isabel Martínez Lozano, de la Fundación ONCE; y Ángela Alcalá Arellano, secretaria executiva de Crue para asuntos estudiantiles.

La Rede SAPDU ye un grupu de trabayu qu'axunta a técnicos de los servicios d'atención a persones con discapacidá de 61 Universidaes Españoles y que trabaya col enfotu de desenvolver los siguientes oxetivos:

• Fomentar la collaboración de los distintos servicios universitarios d'atención a los estudiantes con discapacidá.
• Proponer actuaciones de calter tresversal en materia de discapacidá que puedan ser asumíes poles distintes universidaes.
• Proponer, a les Alministraciones Educatives, l'adopción de midíes para'l cumplimientu efectivu de regular en materia de discapacidá.
• Proponer pautes qu'empobinen la incorporación efectivo y activo de les persones con discapacidá nel conxuntu de la vida universitaria. 
• Promover, espublizar ya intercambiar bones práctiques.
• Impulsar la reconocencia de l'atención a la discapacidá nos distintos sistemes d'evaluación de les universidaes y les sos distintes actividaes.
• Fomentar la collaboración del texíu social del ámbitu de la discapacidá na Rede de Servicios de Sofitu a Persones con Discapacidá na Universidá.