La Fundación EDP y l'Universidá d'Uviéu entamaron un actu esta mañana na see corporativa de EDP España, na Plaza del Fresnu, para dar la bienvenida a los 70 estudiantes de la Universidá d'Uviéu qu'empecipiaron una nueva etapa formativa na compañía enerxética, gracies a les Beques Martín González del Valle.

El programa de beca Martín González del Valle de la Fundación EDP, que cumple 40 ediciones esti cursu 2023-2024, surde coles mires de la fundación de reforzar la collaboración cola comunidá universitaria y cumplir col so compromisu col fomentu del talentu y la conocencia.
L'eventu cuntó cola participación del rector de la Universidá d'Uviéu, Ignacio Villaverde y la directora de la Fundación EDP, Vanda Martins. Dambos aprovecharon esta ocasión para destacar lo ilusionante que va ser esta nueva etapa para ellos, la so primer esperiencia llaboral. Nella, non yá van poder ameyorar les sos habilidaes práctiques, sinón que lo fadrán n'una compañía global que ye un referente nel cuidu del mediu ambiente y que s'esmolez pol futuru del planeta y de les nueves xeneraciones.

La xornada arrincó con una yincana poles cais d'Uviéu, una orixinal iniciativa celebrada per primer vegada coles mires de que los becarios conocer ente ellos, según colos sos tutores, compartiendo xuna actividá distinta que-yos dexó, amás de pasar una ratada xuntos, afayar un pocu más sobro'l llabor de la Fundación EDP. 

Les beques Martin González del Valle representen xuna oportunidá perfecta pa poner en práctica les conocencies adquiríes y les aptitúes personales mientres xuna esperiencia profesional real. Tán dirixíes a estudiantes de 23 graos y 2 másteres, ente los que figuren Ciencia ya Inxeniería de Datos, Inxeniería Eléctrica, Electrónica y Mecánica; Alministración y Dirección d'Empreses, Llingües Modernes y les sos Lliteratures; Comerciu y Marketing o Derechu.

Les beques, frutu del alcuerdu cola Universidá d'Uviéu, van tar dotaes con una ayuda económica de 450 euros brutos al mes y tienen xuna duración máxima de 10 meses. Les práctiques son de media xornada, con una duración de cuatro hores diaries y compatibles cola actividá académica. 

EDP designa a cada estudiante un tutor encargáu de supervisar los trabayos previstos nel desenvolvimientu de les práctiques y facilita a cada alumnu espacios fayadizos de trabayu y el material necesario pa la so correcta realización.

Les beques Martín González del Valle reciben el so nome de Martín González del Valle, quien presidió la compañía enerxética ente 1987 y 1999. Amás del conveniu cola Universidá d'Uviéu, la Fundación EDP caltien alcuerdos con otres universidaes y escueles españoles pa favorecer la formación de más estudiantes nes distintes instalaciones y centros de trabayu que la compañía tien n'otres comunidaes.