Una delegación de la institución asturiana, encabezada pol rector Ignacio Villaverde, va realizar una visita institucional a la Universidá de Harvard, qu'inclúi alcuentros en distintes facultaes y con grupos d'investigación | El rector va presentar na see del Real Colegio Complutense na universidá estadounidense les prioridaes de la institución asturiana en materia de docencia, investigación, innovación y tresferencia, imbricación na sociedá y presencia internacional | L'axenda inclúi visites y xuntes na Harvard Law School, la Harvard Business School, el Broad Institute, punteru na investigación del cáncer, y el MIT, amás de la presentación de grupos d'investigación especializaos en Xenoma y Cáncer, Xéneru y Diversidá, y Socioloxía de l'Alimentación
El Real Colegio Complutense en Harvard acueye la primer selmana de la Universidá d'Uviéu na institución universitaria estadounidense. Una delegación de la universidá asturiana, encabezada pol so rector, Ignacio Villaverde, punxo camín d'Estaos Xuníos, para estrechar relaciones cola Universidá de Harvard. Esti viaxe institucional, nel que se van caltener alcuentros con distintes facultaes y grupos d'investigación de la institución estadounidense, ye unu de los frutos de la incorporación de la universidá asturiana como miembru de plenu derechu del Real Colegio.
El rector Ignacio Villaverde destaca qu'esta primer selmana una “oportunidá escelente” para dar a conocer “lo que faemos na institución académica asturiana”, al Real Colegio y, por estensión, a Harvard, la que ta considerada como la meyor universidá del mundu.
L'apertada axenda de la visita empieza'l martes, 31 d'ochobre, pela mañana, con una visita de la delegación asturiana al Real Colegio Complutense en Harvard, onde se va encetar el presente y futuru de la Universidá d'Uviéu nel marcu de les actividaes del Real Colegio nun alcuentru colos miembros d'esta institución y de la Harvard International Office.
El mesmu martes, pero yá pela tarde, va ser la vez por que'l rector presente, énte miembros de la comunidá universitaria de Harvard, les llínees estratéxiques principales de la universidá asturiana. Villaverde va describir a los docentes ya investigadores estadounidenses les prioridaes de la institución académica asturiana en materia de docencia, investigación, innovación y tresferencia, imbricación na sociedá y presencia internacional.
A otru día, miércoles, 1 de payares, la delegación asturiana va visitar, primero, la Harvard Law School, de la mano de David Kennedy, director del Institute for Global Law and Policy de la universidá norteamericana; dempués, el Observatorio de la Lengua y la Cultura Españoles del Instituto Cervantes na Universidá de Harvard, que dirixe la profesora de la Universidá d'Uviéu Marta Mateo Martínez Bartolomé y, finalmente, el Broad Institute del MIT, nel que s'arrexunten un conxuntu de destacaos investigadores que tienen como misión ameyorar la salú humana. Pela tarde, dos grupos d'investigación de la Universidá d'Uviéu van compartir esperiencies y van presentar les sos llínees de trabayu a los sos homólogos de la Universidá de Harvard. Son, concretamente, los grupos de Xenoma y Cáncer y de Xéneru y Diversidá.
El xueves, 2 de payares, la comitiva asturiana va visitar la Harvard Business School y el MediaLab del MIT, onde van caltener diversos alcuentros. Ese mesmu día, pela tarde, va tener llugar la presentación a investigadores estadounidenses del grupu de Socioloxía de l'Alimentación de la Universidá d'Uviéu. Tamién pela tarde, va ser la vez pa la presentación en Harvard de la Facultá d'Economía y Empresa, que recibió la prestixosa acreditación internacional AACSB.
La delegación institucional va concluyir la so visita, el vienres, 3 de payares, con un percorríu pola Houghton Library, la biblioteca qu'acueye llibros raros y manuscritos de la universidá estadounidense y pol Muséu d'Hestoria Natural, onde van poder ver la escepcional colección de flores de cristal.
Uviéu, miembru de plenu derechu
La Universidá d'Uviéu foi almitida, en febreru del pasáu añu, como miembru de plenu derechu nel Real Colegio Complutense en Harvard (RCCH), un centru universitariu afiliáu a la Universidá de Harvard y destináu a promover la cooperación académica, científica y cultural ente la universidá americana y el sistema español de conocencia. La institución asturiana sumóse asina al amenorgáu grupu d'universidaes integráu, amás de pola Universidá Complutense de Madrid y l'Universidá de Harvard, pola Politécnica de Madrid, Alcalá, Sevilla y Valencia.
El Real Colegio Complutense en Harvard ye xuna institución ensin ánimu d'arriquecimientu con personalidá xurídica mesma otorgada pol Estáu de Massachusetts (USA). Foi creáu en 1990 conjuntamente pola Universidá Complutense y l'Universidá de Harvard, so la presidencia de Derek C. Bok. Esti colexu concibióse como xuna institución conxunta pa fomentar y promover l'intercambiu académicu intelectual y científicu entre Harvard, la Complutense y les universidaes miembru, de la que yá forma parte Uviéu.
El Real Colegio Complutense, amás d'un variáu y estensu programa d'ayudes pa estancies n'EEXX, collabora colos departamentos de la universidá estadounidense na organización d'actividaes especiales, incluyendo alcuentros internacionales con científicos, espertos y profesores de prestíu mundial. La institución ye tamién coespónsor de conferencies y actividaes entamaes na Universidá de Harvard y sirve de see y sofitu institucional a l'Asociación d'Estudiantes Españoles en Harvard (Harvard Spain Student Association). Amás, el Real Colegio Complutense acueye distintos seminarios añales entamaos por instituciones públiques y privaes comenenciudes en collaborar col sistema de conocencia española. El personal docente ya investigador de les universidaes miembru puede solicitar tamién la creación de grupos d'investigación y d'actividaes en collaboración con Harvard. Ye la única institución del mundu que tien xuna see na mesma Universidá de Harvard, instalaciones que van ser utilizaes pol personal de la Universidá d'Uviéu que viaxe ellí amparáu por estes ayudes.
