La incorporación de la Universidá d'Uviéu al Real Colexu Complutense de Harvard empieza a dar los sos primeros frutos. Trés profesores de la institución académica asturiana van beneficiar d'estancies d'investigación na prestixosa universidá estadounidense. Los trés docentes solicitaron ayudes para desenvolver les sos llínees d'investigación na institución d'enseñanza cimera norteamericana nes últimes convocatories del Real Colexu Complutense de Harvard.

Los trés investigadores que llograron les Faculty Research Fellowships, na so denominación n'inglés, son Cristina Valdés Rodríguez, que realiza una estancia ente setiembre y avientu d'anguaño y que ye amás la delegada de la Universidá d'Uviéu nel Real Colexu; María Amparo González Rúa, que va permanecer en tierres americanes mientres el primer trimestre del próximu añu; y Javier García Amez, que va desenvolver les sos investigaciones en Harvard nel segundu trimestre del próximu añu. Cristina Valdés y María Amparo González pertenecen a la área de Filoloxía Inglesa, y Javier García Amez, a la de Derechu Penal. Pa poder avanzar nes sos investigaciones, estos trés docentes fueron esponsorizados, respectivamente, pol departamentu de Romance Languages and Literatures (Harvard Graduate School of Arts and Sciences, HGSAS), la Harvard Graduate School of Education (HGSE) y el Institute of Global Law and Policy de la Harvard Law School.

Ignacio Villaverde, rector de la Universidá d'Uviéu, amosóse bien satisfechu con estes primeres resultancies, por culpa de que llograr les ayudes del Real Colexo nun ye xera fácil. “De los trés pidimientos que presentaron los nuesos investigadores, los trés fueron aprobaes”, destacó'l rector. Villaverde comentó que l'oxetivu de la Universidá d'Uviéu pa la próxima convocatoria del Real Colexu ye presentar más candidatos investigadores sénior y, amás, allegar al programa de beques postdoctorales del RCCHU (2+3) que dexa a nuevos doctores desenvolver les sos llínees de trabayu na Universidá de Harvard mientres dos años y llograr un contratu postdoctoral a la vuelta a la so universidá de trés años más.

Uviéu, miembru de plenu derechu
La Universidá d'Uviéu foi almitida, en febreru del pasáu añu, como miembru de plenu derechu nel Real Colexu Complutense en Harvard (RCCH), un centru universitariu afiliáu a la Universidá de Harvard y destináu a promover la cooperación académica, científica y cultural ente la universidá americana y el sistema español de conocencia. La institución asturiana sumóse asina al selectu grupu d'universidaes integráu, amás de pola Universidá Complutense de Madrid y l'Universidá de Harvard, pola Politécnica de Madrid, Alcalá, Sevilla y Valencia. 

El Real Colexu Complutense en Harvard ye xuna institución ensin ánimu d'arriquecimientu con personalidá xurídica mesma otorgada pol Estáu de Massachusetts (USA). Foi creáu en 1990 conjuntamente pola Universidá Complutense y l'Universidá de Harvard, so la presidencia de Derek C. Bok. Esti colexu concibióse como xuna institución conxunta pa fomentar y promover l'intercambiu académicu intelectual y científicu entre Harvard, la Complutense y les universidaes miembru, de la que yá forma parte Uviéu. 

El Real Colexu Complutense, amás d'un variáu y estensu programa d'ayudes pa estancies n'EEXX, collabora colos departamentos de la universidá estadounidense na organización d'actividaes especiales, incluyendo alcuentros internacionales con científicos, espertos y profesores de prestíu mundial. La institución ye tamién coespónsor de conferencies y actividaes entamaes na Universidá de Harvard y sirve de see y sofitu institucional a l'Asociación d'Estudiantes Españoles en Harvard (Harvard Spain Student Association). Amás, el Real Colexu Complutense acueye distintos seminarios añales entamaos por instituciones públiques y privaes comenenciudes en collaborar col sistema de conocencia española. El personal docente ya investigador de les universidaes miembru puede solicitar tamién la creación de grupos d'investigación y d'actividaes en collaboración con Harvard. Ye la única institución del mundu que tien xuna see na mesma Universidá de Harvard, instalaciones que van ser utilizaes pol personal de la Universidá d'Uviéu que viaxe ellí amparáu por estes ayudes.