El galardón foi recoyíu por Daniel Rodríguez, presidente de AFESA, n'una ceremonia celebrada na Capiya del Edificiu Históricu de la Universidá d'Uviéu y presidida pol rector Ignacio Villaverde | L'asociación busca la meyora de la calidá de vida de les persones con problemes de Salú Mental y les sos families y allegaos, la defensa de los sos derechos universales y la representación del movimientu asociativu, al traviés d'un modelu d'atención de base comuñal y de llucha contra l'estigma | El xuráu destaca la exemplar obra social de l'asociación qu'ufierta programes y actividaes que tienen como oxetivu facilitar la inclusión, rehabilitación y reincorporación del colectivu, fomentando la so autonomía y ufiertando sofitu a les sos families
L'Asociación de Familiares y Persones con Enfermedá Mental (AFESA) recibió'l Premiu Ana Casanueva 2023 n'una ceremonia que tuvo llugar esta tarde na Capiya del Edificiu Históricu de la Universidá d'Uviéu. El galardón foi recoyíu por Daniel Rodríguez, presidente de AFESA, nun actu, presidíu pol rector de la Universidá d'Uviéu, Ignacio Villaverde, que cuntó cola presencia de Carlos Casanueva Vares, presidente d'Inter-Protección, Carlos Fernández Collada, presidente de ASICOM, y Alfredo Canteli, alcalde d'Uviéu.
AFESA naz en 1991, constituyida por un grupu de persones sensibilizaes pola problemática d'esti colectivu n'Asturies. Con see central n'Uviéu, l'asociación tien delegaciones en toles árees sanitaries, allugaes, amás d'en la capital del Principáu, en Navia, Cangas, Avilés, Uviéu, Xixón, Les Arriondes, Mieres y Sama de Llangréu. AFESA busca la meyora de la calidá de vida de les persones con problemes de Salú Mental y les sos families y allegaos, la defensa de los sos derechos universales y la representación del movimientu asociativu, al traviés d'un modelu d'atención de base comuñal y de llucha contra l'estigma. El colectivu ye xuna clara referencia como movimientu asociativu en salú mental.
El xuráu destacó na so acta que AFESA “realizó xuna obra social exemplar, caracterizada pola atención a les persones con problemes de salú mental, ufiertando xuna serie de programes y actividaes que tienen como oxetivu facilitar la inclusión, rehabilitación y reincorporación del colectivu, fomentando la so autonomía y ufiertando sofitu a les sos families y allegaos”.
El Premiu Ana Casanueva ta convocáu pol empresariu y filántropu asturmexicano Carlos Casanueva Vares y l'Asociación Iberoamericana de la Comunicación (ASICOM) en collaboración cola Universidá d'Uviéu. Esti galardón tien como oxetivu reconocer el trabayu d'organizaciones non gubernamentales, instituciones d'asistencia privada, fundaciones, asociaciones civiles y organismos ensin fines d'arriquecimientu que cunten con una trayectoria de, siquier, cinco años a partir de la constitución llegal de la organización y qu'operen nel Principáu d'Asturies. El premiu ta dotáu con 50.000 euros para estremar los proyectos más destacaos mientres l'añu 2022 n'árees d'impactu social n'Asturies. Les exes temátiques para otorgar el premiu son: atención y sofitu a población en condiciones de desventaxa, esclusión social o probeza; xeneración d'oportunidaes y accesu a educación y formación; accesu a servicios sociales y de salú; sofitu a migrantes, y trabayu con grupos vulnerables o en riesgu.
