Un total de 192 estudiantes de doctoráu participen nes docenes Xornaes de Doctoráu de la Universidá d'Uviéu que tienen llugar güei nel salón d'actos del edificiu científicu-técnicu del Campus de Mieres. Estes xornaes tán dirixíes especialmente a estudiantes de doctoráu de la universidá asturiana, pero tamién al restu de la comunidá universitaria de dientro y fora de la rexón. Esta edición cunta cola participación de 15 investigadores sénior, de toles árees de conocencia, con reconocíu prestíu y esperiencia, que van compartir puntos de vista colos doctorandos y a dinamizar les sesiones de micropresentaciones y pósteres.

Les xornaes fueron inauguraes esta mañana por Ignacio Villaverde, rector de la Universidá d'Uviéu; José Miguel Arias, vicerrector de Xestión Académica; Cristina González Morán, directora xeneral d'Universidá; Manuel Ángel Álvarez Álvarez, vicealcalde de Mieres, y Ángel Martín Rodríguez, director de la Escuela Politécnica de Mieres.

La universidá asturiana optó anguaño por un formatu híbridu que combina la presencialidad cola posibilidá de conectase en delles sesiones de forma virtual para dar la oportunidá de participar a aquellos estudiantes de doctoráu de la Universidá d'Uviéu que moren n'otros países o tán realizáu dalguna estancia d'investigación.

El rector tuvo palabres d'aliendu escontra los doctoraos a quien llamó a nun esmorecer nun camín, el de la ellaboración d'una tesis, qu'implica dedicación, soledá, duldes, dacuando, desaliendu ya incertidume, pero, sobremanera, trabayu, enforma trabayu y, finalmente, tamién prestu y pagu. 

Villaverde destacó la fortaleza de la Universidá d'Uviéu na realización de tesis doctorales. “La nuesa institución ta ente les 15 universidaes españoles nes que más tesis se defenden al añu”, sorrayó. “Los nuesos estudiantes lleen más de 220 tesis cada añu y, amás el númberu va n'aumentu. La cifra reflexa la bona salú del nuesu Centru Internacional de Posgrado. Ye un datu bien positivu», aseguró. El doctoráu nun ye solo'l grau académicu más eleváu qu'otorguen les universidaes, sinón que tamién contribúi de forma bien decisiva al desenvolvimientu de la investigación y de la docencia, “d'ende que, pa nós, sía xuna prioridá”, manifestó Villaverde.

Claves del ésitu científicu

Tres l'apertura, la profesora Mar Marcos Sánchez, catedrática d'Hestoria Antigua de la Universidá de Cantabria, y presidenta de la Conferencia de Directores d'Escueles de Doctoráu (CDED), dende l'añu 2019 hasta anguaño, pronunció xuna conferencia titulada Claves pa empecipiar con ésitu la carrera científica. La sesión de la mañana sigue con micropresentaciones de caúna de les árees de conocencia: Artes y Humanidaes (11), Ciencies (13), Ciencies de la Salú (11), Ciencies Sociales y Xurídiques (16), Inxeniería y Arquitectura (16). Les micropresentaciones tán moderaes y dinamizadas polos profesores de la Universidá d'Uviéu: Marcu de la Rasilla Vives y María Esther Álvarez López (Artes y Humanidaes); Susana Montes Rodríguez, Elena Díaz Rodríguez y José María Pérez Freije (Ciencies); Nélida Mª Coneyu Jiménez y Juan Arguelles Luis (Ciencies de la Salú); José Luís San Fabián Maroto; José Manuel Montes Pion, Juan Antonio Trespalacios; Raquel Quiroga Rodríguez y María del Mar Arenas Parra (Ciencies Sociales y Xurídiques); Francisco Javier Belzunce Varela, Jaime Aurelio Viña Olay y Fernando Sánchez Lasheras (Inxeniería y Arquitectura).

Na sesión de tarde preséntense 58 pósteres realizaos por estudiantes de doctoráu correspondientes a les distintes árees de la conocencia: Arte y Humanidaes (9 pósteres), Ciencies (13), Ciencies de la Salú (10), Ciencies Sociales y Xurídiques (17), Inxeniería y Arquitectura (9). La sesión va tar dinamizada polos profesores de la Universidá d'Uviéu.