Tramitar digitalmente un títulu universitariu, una microcredencial, l'asistencia a un cursu de formación o la participación n'unes práctiques son dalgunes de les posibilidaes que va abrir nel futuru para l'alumnáu'l proyectu CertiDigital, una iniciativa entá en fase piloto coordinada por seis universidaes españoles, ente elles la d'Uviéu, na que participen otres 17 universidaes del país. L'oxetivu d'esti proyectu, que s'enmarca nel programa UniDigital del Ministeriu d'Universidaes, ye avanzar nel tresformamientu dixital pa dicir adiós al papel y dotar al sistema universitariu español d'una plataforma tecnolóxica pa la creación y emisión de credenciales dixitales. Les universidaes que formen parte d'esta iniciativa participen n'III Xornaes CertiDigital que, col títulu Implementando credenciales dixitales con ELM en EDC y EBSI, desenvuélvense güei y mañana nel Edificiu Históricu de la Universidá d'Uviéu.

Les xornaes fueron inauguraes esta tarde por Secundino González, delegáu del Rector pal Tresformamientu Dixital de la Universidá d'Uviéu, y Carlos Delgado Kloos, representante de la Universidá Carlos III de Madrid, y van ser clausuraes mañana cola presencia del rector Ignacio Villaverde y l'asistencia virtual de Joan Subirats, ministru d'Universidaes.

El programa UniDigital nel que s'inscribe CertiDigital tien trés oxetivos básicos. Primero, disponer de recursos técnicos, materiales y humanos fayadizos que dexen modernizar el sistema universitariu español, ameyorando significativamente la relación ente'l mundu dixital y l'ámbitu académicu. Segundu, aguiyar la innovación y tresformamientu dixital dende la universidá. Y, terceru, desenvolver proyectos estratéxicos nel ámbitu de la innovación educativa poniendo en marcha un conxuntu escoyíu de proyectos de calter estratéxicu, nel ámbitu de la formación dixital, que funcionen como prototipos y qu'operen en niveles interuniversitarios.

El proyectu ta empobináu al tresformamientu dixital de les universidaes españoles al traviés de les credenciales dixitales. Xuna credencial dixital ye un arquivu dixital que puede contener una gran variedá d'información reconocible y interpretable per parte d'empreses y d'otres instituciones educatives. Amás, ufierta otres munches ventayes sobro los certificaos impresos como l'amenorgamientu del fraude y del trabayu alministrativu por aciu l'automatización y digitalización del trabayu. Estes credenciales tán roblaes con un sellu electrónicu, qu'otorga xuna presunción llegal d'autenticidá en tola UE y dexa verificar darréu información como la entidá que la expede y la garantía calidable d'una cualificación.

CertiDigital emplega pal so desenvolvimientu dos tecnoloxíes europees piqueres: EDC (European Dixital Credentials for Learning) y EBSI (European Blockchain Services Infrastructure). La fase piloto, anguaño en desenvolvimientu va dexar emitir microcredenciales en cursos de formación del personal, formación permanente o actividaes extracurriculares, de la manera más completa y flexible.

“Esta esperiencia va dexanos tresformar los procesos educativos a distintos niveles y perfiles d'usuariu. Dende'l puntu de vista del alumnáu, CertiDigital arriquez el so currículum y favorez la so incorporación al mercáu de trabayu porque les empreses van poder comprobar, inclusive internacionalmente la veracidá de los datos, yá que vamos poder expedir un documentu fiable y exportable a otros países como'l currículum Europa”, destacó'l delegáu del Rector pal Tresformamientu Dixital.

La dirección de CertiDigital ta coordinada poles universidaes Carlos III, Castiella-La Mancha, Granada, Murcia, Rovira i Virgili y Uviéu y la participación ta abierta a cualquier universidá del sistema. La previsión ye que tea en plenu funcionamientu en 2024.

Programa de les xornaes
Nes xornaes d'Uviéu, van encetase delles de les cuestiones de más actualidá rellacionaes cola certificación dixital. Asina, un grupu d'espertos internacionales va afondar na última versión del ELM (European Learning Model o Modelu d'Aprendizaxe Européu), unu de les pilastres nos que se basa'l proyectu. El ELM ye'l modelu de datos específicamente diseñáu pa soportar cualquier ambiente d'aprendizaxe (col que se definen, por casu, los conceutos d'organizaciones educatives, resultaos d'aprendizaxe, llogros, evaluaciones o actividaes). 

Les universidaes asistentes tamién van tener tiempu pa realizar unos talleres en grupos de trabayu nos que les distintes universidaes van modelar distintos casos d'usu que van sirvir como prototipu en cada universidá. Estos casos d'usu van ser definíos utilizando'l framework EDC (European Dixital Credentials for Learning), unu de les pilastres del proyectu sofitáu nel ELM. Los EDCs son documentos electrónicos estandarizados a prueba de manipulaciones que describen qu'el so propietariu tien ciertes habilidaes o llogró ciertes resultancies d'aprendizaxe al traviés d'un contestu d'aprendizaxe formal, non formal o informal.

Amás, parte del eventu va tar dedicáu a afondar nel framework EBSI (European Blockchain Services Infrastructure), l'otru de les pilastres del proyectu, tamién sofitáu nel ELM, gracies a la participación d'espertos n'este framework. EBSI ye xuna infraestructura que dexa crear aplicaciones al traviés d'una tecnoloxía blockchain descentralizada en distintos llugares d'Europa. L'oxetivu va ser esquizar les posibilidaes tanto de EDC como de EBSI na creación de credenciales dixitales. 

Tamién se va desenvolver xuna mesa redonda na que dellos espertos van opinar sobro la so visión de cómo vamos poder pasar d'un prototipu inicial a una producción de credenciales dixitales normalizada nes distintes universidaes españoles.