“¿Qué nota de corte preciso para estudiar Medicina?” “Quiero estudiar Derechu y precisaba saber cómo puedo aportar a una beca”. “Vivu en Chile y quería convalidar los mios estudios. ¿Cómo puedo faelo?” Estes son dalgunes de les entrugues que respuende diariamente, telefónicamente, presencialmente o al traviés del corréu electrónicu, l'equipu qu'atiende'l Centru d'Orientación ya Información al Estudiante (COIE) de la Universidá d'Uviéu. La institución académica asturiana, para ayudar a los estudiantes a resolver cualquier dulda rellacionada colos estudios universitarios, complementa agora esti serviciu con un asistente intelixente, popularmente conocíu como un chatbot, que va tar a disposición de toles persones comenenciudes en tiempu real, les 24 hores del día, los 365 díes del añu.

Alfonso López Muñiz, vicerrector d'Estudiantes de la Universidá d'Uviéu, destaca que, con esta nueva ferramienta d'intelixencia artificial, la institución asturiana “da un saltu tecnolóxicu escontra al futuru y xúnese a les instituciones educatives más vanguardistas al integrar na mesma web institucional un enllaz directu (https://www.uniovi.es/estudia) a esti asistente intelixente”.

El chatbot, desenvueltu pola compañía 1MillionBot, foi entrenáu primeramente con entrugues formulaes por estudiantes, lo que dexó l'automatización de les respuestes a aquelles cuestiones que se repiten con más frecuencia. “Consiguimos asina entainar el procesu yá que l'asistente va tar operativu para cualquier consulta les 24 hores del día, los 365 díes del añu”, sorraya'l vicerrector.

López Muñiz apunta qu'el COIE, nos periodos de máximu trabayu, llega a recibir hasta 400 consultes telefóniques diaries. El vicerrector esclaria qu'esti nuevu asistente intelixente vien complementar, pero non a sustituyir l'asistencia más personalizada, que va siguir emprestándose, como hasta agora, a demanda, siempres que les persones comenenciudes riquir.

El nuevu chatbot de la Universidá d'Uviéu, concebíu para optimizar la información que s'ufierta al alumnáu, forma parte d'una gama de soluciones tecnolóxiques yá implementaes en más de 30 universidaes, como la Universidá de Barcelona, la Universidá Complutense de Madrid, la Universidá de Bonos Aires o la Universitat de Valencia. “Col llanzamientu d'esti asistente, asitiámonos como una institución pionera na adopción de soluciones d'intelixencia artificial y demostremos el nuesu compromisu cola meyora continua. Confiamos en qu'esta ferramienta contribuya significativamente a entainar los procesos alministrativos y a brindar un mayor soporte y atención personalizada al estudiantáu que ye siempres nuesa verdadera razón de ser”, añede'l vicerrector.

Consciente de la importancia d'arreyar al alumnáu nel desenvolvimientu d'esti asistente, la Universidá d'Uviéu va llevar a cabu un concursu nel que l'estudiantáu va poder participar nel procesu creativu del avatar que va representar al asistente. “Con esta iniciativa buscamos fomentar la participación y el compromisu del alumnáu, brindándo-yos la oportunidá de contribuyir viviegamente nel desenvolvimientu d'esta ferramienta tecnolóxico”, conclúi López Muñiz.