Promover la investigación, formación y espardimientu de la intelixencia artificial, el big data y l'analítica de datos y participar de forma conxunta en proyectos d'I+D. Estos son los principales oxetivos del protocolu d'intenciones robláu esta mañana ente la Universidá d'Uviéu y l'Asociación Nacional de Big Data y Analytics (ANBAN). El documentu ye'l primer pasu pa la puesta en marcha de diversos convenios específicos  qu'establezan un marcu de trabayu conxuntu nos campos científicu y tecnolóxicu d'interés común. 

En concretu, la Universidá d'Uviéu y ANBAN van executar proyectos y programes d'investigación y desenvolvimientu, van realizar sofitu científicu técnicu mutuu y van entamar actividaes comunes rellacionaes cola promoción social de la investigación y el desenvolvimientu tecnolóxicu. Coles mesmes, va promovese la formación de personal investigador y la realización de práctiques formatives, va apostar pol desenvolvimientu de productos comerciales a partir de la conocencia xenerada de la investigación realizada por dambos organismos y van emprestase servicios de calter científicu-técnicu.

El protocolu d'intenciones foi robláu por Begoña Cueto, vicerrectora de Tresferencia y Relaciones cola Empresa y Juan José García Milla, presidente de ANBAN, ya inclúi la creación d'un equipu de trabayu conxuntu que va tener por oxetivu llograr un mayor algame de les acciones que se realicen. La mesma vicerrectora va formar parte d'esi equipu nel que tamién va tar, per parte de ANBAN, Sofía González Arias, responsable de l'asociación nel Principáu d'Asturies. 

La vicerrectora Begoña Cueto aprovechó la firma del protocolu pa faer fincapié na importancia d'establecer collaboraciones coles asociaciones de calter científicu, referentes nos distintos ámbitos que representen. “Estes asociaciones tán nel día ente día nel sector, en comunicación constante coles empreses y cola sociedá, polo que pa la universidá resulta básicu texer tar redes de collaboración”, esplicó. 

ANBAN ye  xuna asociación ensin ánimu d'arriquecimientu que naz coles mires de xunir trés pilastres de la Intelixencia Artificial y Big Data n'España: les universidaes y escueles, los profesionales  y les empreses que quieren implementar intelixencia artificial nes sos estratexes. Ente los sos fines figura'l de crear y desenvolver un centru de conocencia pa crear sinergias ente estes pilastres y potenciar l'aprendizaxe, la investigación y el desenvolvimientu del analís de datos por aciu el so espardimientu y divulgación.