El trabayu ganador, publicáu en 'Nature Communications', epondera la figura de la mecánica cuántica para la conocencia de los rellabicos del enllaz químicu
Los investigadores Ángel Martín Pendás y Evelio Francisco Miguélez, dambos catedráticos de la Universidá d'Uviéu, fueron estremaos güei col Premiu al Artículu Científicu del añu 2022 na Área de la Química n'Asturies. Esti galardón, qu'otorga la Sección Territorial d'Asturies de la Real Sociedá Española de Química, col patrociniu de la empresa Química del Nalón, tien por oxetu visibilizar y sopelexar la investigación científica nel ámbitu de la Química desenvuelta nel Principáu d'Asturies.
L'artículu premiáu, tituláu n'inglés The role of references and the elusive nature of the chemical bond, foi publicáu en Nature Communications y enceta l'entendimientu de les característiques del enllaz químicu al traviés d'un estudiu computacional onde fueron consideraos aspeutos enerxéticos y espaciales para destacar la importancia de la deslocalización de los electrones nel sustentu del enllaz químicu. Esti artículu, según la comisión evaluadora, epondera la figura de la mecánica cuántica para la conocencia de los rellabicos del enllaz químicu.
El fallu del trabayu premiáu y de los dos finalistes conocióse esta mañana nun actu desenvueltu na Aula Severu Ochoa del Edificiu Históricu de la Universidá d'Uviéu nel qu'intervinieron Humberto Rodríguez-Solla, vicerrector de Relaciones Institucionales y Coordinación; Félix Rodríguez Iglesias, presidente de la Sección Territorial d'Asturies de la Real Sociedá Española de Química; Emilio Sánchez Cortezón, patrocinador del premiu (Industrial Química del Nalón); José Mario Díaz Fernández, presidente de l'Académica Asturiana de Ciencia ya Inxeniería; y Vicente Gotor Fernández, coordinador de l'actividá Premio RSEQ-Asturies al Artículu Científicu del Añu 2022 na Área de la Química n'Asturies.
Los dos trabayos finalistes recayeron en dos talos artículos roblaos por Lucía López, María Paz Cabal y Carlos Valdés, publicáu en Angew. Chem. Int, y por Shahin Sowlati Hashjin, Vojtech Sadek, SeyedAbdolreza Sadjadi, Mikko Karttunen, Ángel Martín Pendás y Cina Doroutan Nejad, publicáu en Nature Communications.
