La esposición componse de más de doscientes fotografíes escoyíes d'ente cientos de miles d'instantánees tomaes pol autor dende l'entamu de la so carrera nel periódicu El País en 1976 | Na amuesa, espuesta na sala de exposición Sabadell Herero, tán representaos tolos xéneros, dende sucesos a semeyes, pasando por política o reportaxes
Más de doscientes fotografíes tomaes en daqué más de cuatro décades que suponen tou un homenaxe a la carrera d'unu de los fotoperiodistes más destacaos del panorama nacional, Bernardo Pérez Tovar. Asina ye l'amuesa Comprometíu cola realidá, una retrospectiva que recueye una selección d'imaxes, escoyíes ente los cientos de miles tomaes por Bernardo Pérez Tovar desque empecipió la so carrera nel diariu El País y que, dende güei, va poder visitase na sala Sabadell Herrero de la mano de la Universidá d'Uviéu
L'amuesa, inaugurada esta mañana por el mesmu autor, acompañáu del rector de la Universidá d'Uviéu, Ignacio Villaverde; la vicerrectora d'Estensión Universitaria y Proyección Cultural, Pilar García Cuetos; el director xeneral de Política Llingüística del Principáu, Antón García y el director comercial del Banco Sabadell Herrero, Alfredo Fernández Santos, va poder visitase hasta'l próximu 31 de mayu. Nella, en palabres del rector de la Universidá d'Uviéu, “pueden atopase les sos fotografíes más icónicas pero tamién ente les decenes d'imaxes escoyíes tán aquelles que-y impactaron y marcaron”. “Tamos primero de too un homenaxe al enfotu de Pérez Tovar n'amosar una realidá lo más honesta posible imprimiendo'l so sellu en cada unu de los disparos de cámara”, dixo Villaverde.
Pela so parte, Alfredo Fernández Santos, director comercial de Sabadell Herrero, animó a tolos ciudadanos "a qu'esfruten a lo llargo de les próximes selmanes esta amuesa que güei inauguramos de la mano de la Conseyería de Cultura del Principáu y, nesta ocasión, tamién de la Universidá d'Uviéu. Caltenemos un compromisu firme de sofitu al espardimientu de la cultura y toi convencíu de que vamos poder siguir compartiendo con tolos asturianos l'arte nes sos distintes sensibilidaes y siguir cumpliendo asina col oxetivu cultural que'l Sabadell Herrero tien adquiríu col Principáu d'Asturies.”
Na amuesa, coordinada pola Universidá d'Uviéu y que cunta cola collaboración del Gobiernu del Principáu d'Asturies, tán representaos tolos xéneros nos que se somorguió Pérez Tovar. Asina, hai sucesos, política, reportaxes y semeyes, entamaos en trés series: Retrospectiva, xuna selección personal de lo meyor de les sos cobertories informatives; Furacos negros, cróniques visuales de delles de les zones más probes del mundu y Xente con Lluz, semeyes de persones ensin necesidá de presentación énte la mirada de Tovar y la pluma de Luz Sánchez Esmorniáu.
