Fuxir de la señardá, la quexa y l'agraviu y apostar pola suma, la collaboración y l'enfotu. Ye'l mensaxe d'optimismu qu'Ignacio Villaverde, rector de la Universidá d'Uviéu, treslladó esta mañana a los asistentes al actu académicu de Santu Tomás de Aquino, que se desenvolvió na Biblioteca del Edificiu Históricu. Mientres la ceremonia, na que tuvo llugar la entrega de premios estraordinarios de doctoráu a los estudiantes que presentaron la so tesis na universidá asturiana mientres el cursu 2020-2021, el rector esbilló los principales desafíos de la institución para l'añu en cursu. 

 

El máximu responsable de la institución académica avanzó qu'una de les prioridaes del so equipu de gobiernu para anguaño ye llograr que los planes estratéxicos fáiganse "pasu ente pasu" realidá. Villaverde incluyó tamién ente los principales desafíos de la so acción l'afitamientu de INGENIUM, que'l so arranque tuvo llugar n'Uviéu esta mesma selmana, el desenvolvimientu del alcuerdu de financiamientu col Principáu, "que nos sollivia, pero tamién nos esixe", y acometer la necesaria reordenación de la ufierta académica y, sobremanera, de les infraestructures, pa faeles más eficientes y sostenibles. "En definitiva –puntualizó Villaverde—faer más universidá".

 

El rector, qu'empunxo la so alocución del maxisteriu de Santiago Ramón y Cajal, parafrasió al Premiu Novel p'aconseyar a los nuevos doctores y doctores trés cualidaes que tienen d'afatar la excelencia: vencer les esmoliciones del principiante; cultivar la independencia mental, l'interés intelectual y l'esfotu nel trabayu, y redactar solo cuando se tenga daqué nuevu que dicir y callase cuando nun haya nada nuevo. "Los que güei táis equí sois espresión de toes estes riegles. El profesor Ramón y Cajal taría arguyosu de vós y vós, como yo tar", treslladó-yos.

 

El doctoráu: "xuna prueba y nun xuna meta"

 

Para Villaverde, "el doctoráu ye la máxima espresión de la reconocencia académica. Nada hai más altu nel escalafón de la excelencia del saber qu'algamar esi grau. Pero en realidá nun ye xuna meta, ye xuna prueba", manifestó-yos. "El doctoráu, una vegada alcanzáu, diz de nós que nun hai retu nin dificultá que nos arredre, que nun hai xera por complexa, llarga o apolmonante que sía, que nun síamos capaces d'encarar con métodu y paciencia. Un máster enséñanos a faer. Un doctoráu enséñanos a saber", añedió.

 

Nesti contestu, Villaverde calificó cómo, na so opinión, tendría de ser el trabayu de la universidá del presente, la que tienen que construyir el doctores y doctores presentes nel actu académicu. "La universidá, la ciencia, güei más que nunca, ye fluyida, móvil, glocal, tresversal, multidisciplinar, grupal", esplicó. "Más qu'importar profesores, tratar de retener y atraer al meyor", abogó'l rector.

 

Cola alcordanza inda recién del llanzamientu de INGENIUM, el máximu responsable de la universidá asturiana centró bona parte de la so intervención na estratexa de internacionalización de la institución académica. "Qué importantes son equí aliances estratéxiques como la qu'acaba d'arrincar n'este mesmu edificiu, INGENIUM, o'l Grupu 9 d'Universidaes dispuestu a encarar el retu de ser la gran alianza d'universidaes públiques españoles", matizó. "Intensificar les relaciones institucionales de la Universidá d'Uviéu con otres grandes universidaes, alcordar titulaciones compartíes, fomentar la movilidá de docentes y discentes, y que nes nueses aules, biblioteques y llaboratorios resonen idiomes y acentos diversos". Ese l'oxetivu espresáu por Villaverde, que pidió paciencia porque, al so xuiciu, llogralo rique de trabayu calláu y de tiempu.  Nun despintó, sicasí, el rector el so prestu polo yá realizao: "INGENIUM ye'l güei: diez universidaes europees dispuestes a crear el mayor y más plural campus universitariu d'Europa". 

 

Ignacio Villaverde recordó tamién, dirixiéndose a el doctores, dalgunos de los llogros alcanzaos mientres anguaño. Mentó, en concretu, la implantación de midíes y preseos de sofitu al profesoráu más nuevu, la guía emponedora pa profesoráu novel, los esitosos cursos de sofitu a la formación docente ya innovadora, y los cursos y ferramientes puestes a la so disposición pa sofitar les sos carreres académiques desenvueltes pol Institutu d'Innovación ya Investigación Educativa de la Universidá (INIE), la Biblioteca Universitaria y los Vicerrectorados d'Investigación y Polítiques del Profesoráu. "Vamos adulces, pero con determinación, cumpliendo colos nuesos compromisos pa construyir, ente toos, la universidá que queremos".

 

Ignacio Villaverde concluyó d'esta miente la ceremonia académica na que s'apurrieron los premios estraordinarios a los 44 doctores y doctores que presentaron les meyores tesis na institución académica. Estos galardones estremen los trabayos más destacaos nes árees d'artes y humanidaes, ciencies, ciencies de la salú, ciencies sociales y xurídiques, inxeniería y arquitectura. L'actu cuntó cola presencia, amás del equipu rectoral, de Borja Sánchez, conseyeru de Ciencia, Innovación y Universidá; Cristina González, directora xeneral d'Universidá, y de los miembros de la comunidá universitaria. 

 

Conferencia de la presidenta de DuPont n'España y Portugal

 

Mientres l'eventu, tuvo llugar tamién la conferencia d'Ángela Santianes de Molenes Arbesú, presidenta de DuPont n'España y Portugal, titulada Asturies, un paraísu d'oportunidaes, na que la ponente encetó cómo convertir los retos en grandes oportunidaes nel futuru próximu de la nuesa rexón. Santianes de Molenes abogó por amontar el texíu empresarial ya industrial y por avanzar na necesaria evolución formativa pa poder dar respuesta a les nueves demandes del mercáu llaboral nuna sociedá que tien de ser cada vez más sostenible en términos sociales, económicos y medioambientales.