Les diez universidaes europees socies de INGENIUM amosaron el so enfotu, al términu de la xunta de llanzamientu celebrada na Universidá d'Uviéu, na viabilidá y el futuru d'esta alianza internacional que tien por oxetivu crear un supercampus européu esplegáu nos diez países que participen nel proyectu.

 

El rectores y altos representantes de les diez universidaes coincidieron ayeri, mientres l'alcuentru de conclusiones, en destacar el gran trabayu que l'alianza tien per delantre y la seguridá de vencer xuníos les adversidaes que se presenten nel camín. Tolos participantes estimaron, nes sos intervenciones, el trabayu realizáu pola Universidá d'Uviéu, anfitriona y coordinadora de l'alianza, según la bona acoyida, la productividá del alcuentru y el compromisu demostráu por tolos socios. 

 

Mientres l'alcuentru de presentación de conclusiones, que s'estendió mientres una hora y precedió al actu de clausura de la xunta, participaron dellos representantes por caúna de les diez universidaes que formen parte del consorciu. Per parte de la Universidá d'Uviéu, abrieron la xunta'l director de la Área Internacionalización de la Universidá, Agustín Nieto, y la directora de la Área de Movilidá Universitaria y de l'Alianza INGENIUM, Ana Isabel Álvarez. 

 

La delegación de la Universidá Médica de Sofía, una de les integrantes de l'alianza, afirmó que la hospitalidá y la bona organización del congresu per parte de la Universidá d'Uviéu tenía de sirvir como exemplu pa futuros alcuentros que se desenvolvieren nel marcu de INGENIUM.

 

El presidente de la Universidá de Ciencies Aplicaes del Sudoeste de Finlandia, Heikki Saastamoinen, destacó qu'estos díes sirvieren a la so institución pa reafitar que non solo taben faciendo lo correcto, sinón que tamién lo taben faciendo colos socios correctos.

 

Nesa mesma llínea espresó'l vicerrector de Relaciones Internacionales de la Universidá de Rouen-Normandía, Eric Dargent, quien tamién sorrayó qu'unu de los retos que l'alianza tien por delantre ye la necesidá de enfatizar y comunicar les diferencies que faen a INGENIUM única y distinta a les otres 43 aliances universitaries que tán en marcha na Unión Europea.

 

Esti alcuentru de llanzamientu de tolos socios de l'alianza constituyó una estraordinaria oportunidá p'ameyorar l'entendimientu mutuu, fortalecer los venceyos ente les universidaes participantes y dar visibilidá pública al compromisu de favorecer la cooperación interuniversitaria y avanzar asina nos desafíos qu'encaren les universidaes europees. La xunta sirvió amás pa sentar les bases del programa de trabayu de los socios pa los próximos cuatro años, según pa distribuyir les xeres y alcordar los oxetivos concretos que tendrán de algamar nesti periodu de tiempu.

 

Actu de clausura

 

Nel actu de clausura, Ignacio Villaverde, rector de la Universidá d'Uviéu, que tuvo palabres d'agradecimientu escontra tolos participantes, sorrayó que les diez universidaes vamos ser una. "Precisamos el lideralgu de la conocencia, de la ciencia, de la educación, y tenemos de faelo xuntos. Compensemos les amenaces con una universidá europea xunida y comprometida cola paz", indicó. "Esta alianza ye una oportunidá, un universu de posibilidaes. Tamos arguyosos con esta alianza, comprometíos cola igualdá, la non discriminación, la inclusión, la sostenibilidá, y tamos preparaos p'asumir el retu", añedió'l rector que calificó a INGENIUM como "nuesa máxima prioridá estratéxica, INGENIUM ye agora'l nuesu llar", concluyó Villaverde.

 

L'alianza que lidera la institución asturiana ta integrada pola Universidá de Ciencies Aplicaes de Karlsruhe (Alemaña), la Universidá de Medicina de Sofía (Bulgaria), la Universidá de Ciencies Aplicaes del Sudeste de Finlandia, la Universidá de Rouen-Normandía (Francia), la Universidá de Creta (Grecia), la Universidá Tecnolóxica de Munster (Irlanda), la Universidá Grabriele d'Annunzio de Chieti-Pescara (Italia), la Universidá Técnica Gheorghe Aschi de Iasi (Rumanía) y l'Universidá de Skövde (Suecia).

 

Los oxetivos más concretos d'esti supercampus européu universitariu son ellaborar programes de Grau, Máster y Doctoráu conxuntos dientro de los marcos normativos nacionales y europeos, sofitar la collaboración de los grupos d'investigación de les universidaes de l'alianza, la promoción de la innovación docente y l'educación permanente y la creación d'una plataforma dixital de comunicación, xestión y docencia online qu'aprova de soporte tecnolóxicu a INGENIUM. Una de les finalidaes más interesantes d'esta alianza ye la promoción de la movilidá internacional, de manera que los alumnos, docentes y el personal d'alministración y servicios de les diez universidaes que la integren pueden cursar estudios o trabayar en cualesquier d'elles.