Apurrir información al alumnáu con necesidaes específiques que pueda tar interesáu en realizar dalguna movilidá nos sos estudios universitarios, con especial atención a cuestiones rellacionaes con beques, recursos, adaptaciones o accesibilidá y amosar esperiencies personales concretes que puedan apurrir la so visión personal. Estos fueron los principales oxetivos de la xornada "Por una movilidá más inclusiva", celebrada'l 24 de xineru na aula Magna del Edificiu Históricu de la Universidá d'Uviéu, y que foi inaugurada pol vicerrector d'Estudiantes, Alfonso López Muñiz.

 

La xornada empezó cola intervención de la responsable de la Oficina d'Atención a Persones con Necesidaes Específiques (ONEO), Marián Flórez, y cola presidenta de ESN-Uviéu, Kimberly Álvarez, que presentó'l Proyectu Erasmus Student Network-Fundación ONCE. Tres ella, Camino González Ordás y Macarena Sánchez Prieto, de la Fundación ONCE, esplicaron les distintes víes de sofitu que tien l'estudiantáu con necesidaes específiques al traviés d'esti organismu. En concretu, dispon d'una beca de 6.000€ para un cursu académicu d'ERASMUS, compatible con otres ayudes. Amás, ufiertaron datos sobro alumnáu con discapacidá que participó en programes de movilidá y ufiertaron información sobro les Beques Reina Leticia, con delles partíes que pueden destinase a estancies ERASMUS, y que son xestionaes por esta Fundación. 

 

Les beques del SEPIE, Serviciu Español pa la Internacionalización de la Educación, fueron presentaes de siguío por Marián Flórez. Estes ayudes tán previstes dientro del programa oficial ERASMUS+ y, nel casu de la Universidá d'Uviéu, son xestionaes directamente pol Vicerrectorado de Internacionalización. Les beques son un sofitu económicu complementariu pal alumnáu que tien reconocida xuna discapacidá igual o mayor al 33% y recueyen, en función de necesidaes personales, y cubren cuestiones como viaxes, acompañante, gastos d'agospiamientos especiales, profesionales de sofitu nel llugar de destín, etcétera. 

 

A lo último, como broche final de la xornada, antiguos alumnos cuntaron la so esperiencia personal. Como alumna con una movilidá Erasmus entrante, Sara Marchetti, rellató la so vivencia na Universidá d'Uviéu y ufiertóse voluntaria p'ayudar a cualquier alumnu de la institución asturiana que quiera cursar un ERASMUS na so universidá d'orixe. Pela so parte, Javier Costa García, estudiante del Grau en Medicina na Universidá d'Uviéu, cuntó cómo fuera la so esperiencia'l cursu pasáu, cuando realizó xuna estancia nuna universidá belga, con datos sobro los sofitos qu'atopó y con una valoración final bien positiva. 

 

Sergio Maté Suárez, estudiante d'Inxeniería de Software, con una discapacidá bien elevada y con muncha necesidá de sofitu, rellató la so estancia en plena pandemia del COVID, que tuvo que concluyir yá en casa al traviés de docencia online por causa de la situación sanitaria. Amás, cuntó con una beca SICUE na Universidá de Málaga, con sofitu directu de la Universidá d'Uviéu qu'apurrió'l financiamientu necesariu por que cuntara con un becariu d'acompañamientu y sofitu. Pela so parte, Adrián Vázquez López, exalumno de la Universidá d'Uviéu, faló de la so esperiencia nuna movilidá Erasmus, dende una perspectiva bien positiva y de crecedera y autonomía.