Rectores y otros altos representantes de les diez universidaes europees socies de l'Alianza INGENIUM, un programa lideráu pola Universidá d'Uviéu, danse cita mientres dos díes nel Edificiu Históricu de la institución académica para empezar oficialmente los trabayos que dexen desenvolver un supercampus universitariu esplegáu per diez países con idiomes distintos coles mires de promover la cooperación interuniversitaria. 

 

Esti alcuentru de partida de tolos socios de l'alianza constitúi una estraordinaria oportunidá para ameyorar l'entendimientu mutuu, fortalecer los venceyos ente les universidaes participantes y dar visibilidá pública al compromisu de favorecer la cooperación interuniversitaria y avanzar asina nos desafíos qu'encaren les universidaes europees. La xunta tendrá de sirvir amás pa sentar les bases del programa de trabayu de los socios pa los próximos cuatro años, según pa distribuyir les xeres y alcordar los oxetivos concretos que tendrán de algamar nesti periodu de tiempu.

 

Ignacio Villaverde, rector de la Universidá d'Uviéu, destacó mientres l'actu d'apertura que nuesa misión como universidaes ye crear y tresmitir el saber p'ayudar a construyir el meyor mundu posible. "Este tien de ser el nuesu compromisu como alianza INGENIUM. La lluz que tien d'emponer el nuesu proyectu de construcción del mayor campus européu d'educación cimera, que percuerre la xeografía europea d'estremu a estremu y atesora la tradición y la vitalidá de diez universidaes que quieren trabayar xuntes por una Europa meyor al traviés de la educación, la conocencia y l'innovación", sorrayó.

 

El rector recordó que'l propósitu de INGENIUM ye crear una gran "universidá europea", resultante de la suma de diez grandes instituciones académiques d'educación cimera, que'l so oxetivu ye'l de convertise nun referente internacional de la innovación, el pensamientu críticu y la ciencia ya investigación d'alta calidá".  "La so misión consiste en ser un campus européu comprometíu colos valores de la Unión, coles sos estratexes d'especialización intelixente y custodios de la conocencia como un bien común irrenunciable", esplicó.

 

L'alianza que lidera la institución asturiana ta integrada pola Universidá de Ciencies Aplicaes de Karlsruhe (Alemaña), la Universidá de Medicina de Sofía (Bulgaria), la Universidá de Ciencies Aplicaes del Sudeste de Finlandia, la Universidá de Rouen-Normandía (Francia), la Universidá de Creta (Grecia), la Universidá Tecnolóxica de Munster (Irlanda), la Universidá Grabriele d'Annunzio de Chieti-Pescara (Italia), la Universidá Técnica Gheorghe Aschi de Iasi (Rumanía) y l'Universidá de Skövde (Suecia).

 

Los oxetivos más concretos d'este supercampus européu universitariu son ellaborar programes de Grau, Máster y Doctoráu conxuntos dientro de los marcos normativos nacionales y europeos, sofitar la collaboración de los grupos d'investigación de les universidaes de l'alianza, la promoción de la innovación docente y l'educación permanente y la creación d'una plataforma dixital de comunicación, xestión y docencia online qu'aprova de soporte tecnolóxicu a INGENIUM. Xuna de les finalidaes más interesantes d'esta alianza ye la promoción de la movilidá internacional, de manera que los alumnos, docentes y el personal d'alministración y servicios de les diez universidaes que la integren pueden cursar estudios o trabayar en cualesquier d'elles.

 

La Universidá d'Uviéu lidera INGENIUM en presentando una propuesta a la convocatoria de 2022 de la iniciativa Universidaes Europees de la Comisión Europea, que ye parte de l'acción d'Asociaciones d'Excelencia del programa Erasmus+. La universidá asturiana, como coordinadora de la propuesta, va encargar de liderar la xestión de l'alianza INGENIUM, qu'empezó esta mañana a dar los sos primeros pasos. 

 

Esti alcuentru de partida va axuntar mientres güei y mañana nel Edificiu Históricu d'Uviéu a cuatro rectores de les universidaes acomuñaes. Amás d'Ignacio Villaverde, encabecen les delegaciones d'esti cume d'universidaes europees el rectores Dan Cascaval, de la Universidá Técnica Gheorghe Aschi de Iasi (Rumanía); Heikki Saastamoinen, de la Universidá de Ciencies Aplicaes del Sudeste de Finlandia, y Maggie Cusack, de la Universidá Tecnolóxica de Munster (Irlanda).