El proyectu piloto de xeneración d'enerxía undimotriz (a partir del aguaxe), que tán desenvolviendo conjuntamente les empreses finlandesa AW-Energy y asturiana Duro Felguera en collaboración cola Universidá d'Uviéu y l'Autoridá Portuaria d'Avilés, ye'l protagonista del quintu episodiu de la serie Quest for climate solutions, financiada pol Bancu Européu d'Inversiones  coles mires d'amosar iniciatives destacaes ya innovadores para faer frente a los retos plantegaos pol cambéu climáticu. 

 

Quest for climate solutions pasa por ser la primer serie webVR interactiva de vídeos 360º graos. Nel rodaxe empléguense drones y cámares 360º con una resultancia espectacular d'esperiencia inmersiva. La serie ta producida por Iralta VR Audiovisual production, con guión de Chris Welsch y presentada pola directora de Comunicación audiovisual del BEI, Heidi Lipsanen.

 

Projects From Finland to Spain: the power of waves ye'l títulu d'esti capítulu qu'acaba d'estrenase, rodáu n'Asturies y Finlandia el pasáu mes de mayu. Nel Principáu, les localizaciones fueron les oficines y el taller de calderería pesada de Duro Felguera, el Puertu d'Avilés y el pozu Fondón, escoyíu esti postreru como representación simbólica de la transición que se ta llevando a cabu n'Asturies dende la industria pesao y contaminante escontra nueves fórmules de producción respetuoses col mediu ambiente.

 

El proyectu consiste na instalación de dellos dispositivos nel mar, na redoma del Puertu d'Avilés, capaces de prindar enerxía llimpia de los movimientos de les foles del océanu y destinala a la descarbonización del puertu por aciu la integración de soluciones d'enerxía anovable ya hidróxenu anovable. El sistema yá foi probáu con ésitu na mariña de Portugal (Peniche). Los dispositivos consten d'una base de formigón flotante que se lleva al fondu marín por aciu inyección d'agua, sobro la que se fondia un panel trémbole que se mueve col aguaxe pa producir la enerxía y, bien taría conectáu a una subestación en tierra al traviés d'un cable submarín, bien a un electrolizador pa, de la mesma, producir hidróxenu verde.

 

El profesor Mario López Gallego, del Departamentu de Construcción de la Universidá d'Uviéu, lidera l'equipu d'investigación que collabora nel proyectu dende la Escuela Politécnica de Mieres. Los sos miembros participaron n'investigaciones pal aprovechamientu dela enerxía de les foles y otres anovables marines. Anguaño la universidá forma parte del consorciu de POROS, un proyectu européu que precisamente escuerre'l suministru de los puertos con enerxíes anovables y qu'acaba de consiguir una estensión del so financiamientu per parte del programa Espacio Atlánticu de INTERREG.