La Universidá d'Uviéu presenta'l so primer informe sobro ciberviolencias nel ámbitu xuvenil
Les formes más frecuentes de violencia exercida al traviés de les redes sociales son el robu de contraseñes o suplantación de la identidá, la recepción d'imaxes íntimes d'otres persones ensin la so autorización, la unviada de mensaxes intrusivos y l'estorsión para torgar la distribución de conteníos íntimos | La universidá recueye nun documentu les midíes de protección integral a les víctimes tantu de violencia de xéneru como sexual qu'inclúi, por casu, la gratuidá na matrícula, a la que s'acoyeron esti cursu 38 fíos y fíes de víctimes | La institución conmemora'l Día Internacional d'Eliminación de la Violencia contra la Muyer con un actu institucional na Facultá de Derechu que cuntó como convidada cola jueza afgana Nazima Nezrabi | El decanu de Derechu sorraya que se tán desenvolviendo, n'ámbitos dixitales, unos patrones culturales que fomenten un tipu de relación de control y atribución de roles nes relaciones de pareya que pueden convertise en violencia de xéneru
La Universidá d'Uviéu presentó güei el so primer informe sobro ciberviolencias nel ámbitu universitariu realizáu en collaboración col Conseyu de la Mocedá d'Uviéu. El trabayu, nel que participaron estudiantes de la institución asturiana, apurre datos sobro la percepción y l'allugamientu énte la violencia y les estratexes de prevención y autodefensa. L'informe revela, por citar solo delles cifres destacaes, qu'el 67% de les persones entrevistaes conocen a persones a quien robaron les contraseñes o se fixeron pasar por elles. El 38% recibieron imaxes íntimes d'otres persones ensin el consentimientu de les afectaes y el 37% viéronse fadiaes pola recepción de mensaxes privaos unviaos por Instagram.
L'informe foi presentáu güei mientres l'actu institucional del Día Internacional d'Eliminación de la Violencia contra la Muyer, que se conmemora mañana, y que se desenvolvió na Facultá de Derechu. L'actu cuntó cola participación d'Ángel Espiniella, secretariu xeneral de la Universidá d'Uviéu; Paz Menéndez Sebastián, directora de la Área d'Igualdá; Javier Fernández Teruelo, decanu de la Facultá de Derechu, y Berta Suárez Polu, técnica de participación del Conseyu de la Mocedá d'Uviéu. Amás, intervieno de forma destacada la jueza afgana Nazima Nezrabi, que pronunció xuna conferencia sobro la violencia estrema nel so país. Nezrabi, qu'exerció seis años como jueza nuna sala especializada en delitos de terrorismu cometíos, principalmente. por talibanes, vive en Bilbao dende'l 30 d'agostu de 2021, en dexando tras tola so vida n'Afganistán.
Diagnósticu sobro la violencia
La directora de la Área d'Igualdá destacó que pa la institución académica ye prioritariu cuntar con un bon diagnósticu sobro la percepción que la violencia tien la comunidá universitaria. Con esti propósitu, la universidá encargó al Conseyu de la Mocedá d'Uviéu l'informe sobro ciberviolencias presentáu güei que supon un puntu de partida más que de llegada. Nel trabayu participaron 349 persones, ente los 18 y los 35 años, mayoritariamente muyeres y estudiantes de la Universidá d'Uviéu. Acordies con Berta Suárez, l'informe, que lleva por títulu Aproximamientu a les violencies machistes en redolaes online. Xuna mirada dende la mocedá, apurre datos relevantes pa conocer la violencia exercida na rede, anque nun puede considerase un estudiu sociológicamente representativu, yá que precisa nuevos trabayos pa ser completáu.
L'analís revela que la rede social más utilizada pol estudiantáu de la Universidá d'Uviéu ye whatspp, con un 97%, siguida Instagram, con un 90%. La menos emplegada ye Tinder, con un 70% que nun la usaron nunca.
Les formes más frecuentes de violencia exercida al traviés de les redes sociales son, por esti orde, el robu de contraseñes o suplantación de la identidá, la recepción d'imaxes íntimes d'otres persones que nun dieron autorización, la unviada de mensaxes intrusivos, fundamentalmente al traviés de Instagram, el ghosting o corte sópitu de la comunicación, anque nun ta tipificado específicamente como violencia, y l'estorsión o chantaxe pa torgar la distribución de conteníos íntimos.
La violencia de xéneru ente los mozos
Javier Fernández Teruelo, decanu de la Facultá de Derechu, presentó xuna ponencia sobro la violencia de xéneru ente los mozos. Teruelo destacó que, dende va tiempu, tán desenvolviéndose, especialmente nel ámbitu dixital, un patrones culturales que, siendo parcialmente nuevos, fomenten un tipu de relación de control y atribución de roles nes relaciones de pareya qu'a mediu y llargu plazu pueden convertise en formes de violencia de xéneru.
Protección integral de les víctimes
Paz Menéndez Sebastián, directora de la Área d'Igualdá, presentó tamién mientres l'actu institucional el documentu tituláu Protección integral de les víctimes de violencia de xéneru y de violencia sexual na Universidá d'Uviéu, nel que se recueyen, amás de les definiciones de dambos tipos de violencia, los derechos que pueden exercer tanto les víctimes de la violencia como los sos fíos y fíes na institución académica. Asina, la directora d'Igualdá recordó, por casu, que los descendientes directos de les víctimes pueden acoyese a la exención del pagu de matrícula. Nel presente curso académicu, 38 estudiantes exercieron esti derechu.
Galería d'imaxes
Documents
- Manifiesto de RUIGEU con motivo del Día Internacional por la Eliminación de la Violencia contra las Mujeres
- Manifiesto de la Crue con motivo del Día Internacional por la Eliminación de la Violencia contra las Mujeres
- Estudio Aproximación a las violencias machistas en entornos online. Una mirada desde la juventud
