El Conseyu de Gobiernu de la Universidá d'Uviéu, na xunta celebrada esta mañana, ratificó'l conveniu de financiamientu col Gobiernu d'Asturies y l'Universidá d'Uviéu, un alcuerdu que garantiza la estabilidá presupuestaria de la universidá hasta 2028. El conveniu va suponer yá para'l 2023 un 8% más d'aportación económica (12 millones más) y un total que supera los 1.000 millones d'euros para los próximos seis años. Amás, l'alcuerdu ye prorrogable otros cuatro, polo que, tal que esplicó'l rector, Ignacio Villaverde, "supon un horizonte de diez años, lo qu'ufierta a la Universidá d'Uviéu una estabilidá presupuestaria como nunca antes tuvo".

 

El conveniu inclúi una medría nel financiamientu por resultancies, que pasa de los 2,5 millones que se contemplaben en 2022 a los 3,1 en 2023. El xerente de la Universidá d'Uviéu, José Antonio Díaz Llagu, esplicó a los conseyeros qu'esta cantidá ta venceyada al cumplimientu de 25 indicadores de meyora, fundamentalmente en docencia, investigación, internacionalización, tresferencia de conocencia ya igualdá. Tres el vistu bonu del Conseyu de Gobiernu universitariu, l'aprobación del conveniu pasa agora, de primeres, pol Conseyu Social y, a lo último, pol Conseyu de Gobiernu del Principáu.

 

Actualización del Protocolu de Prevención del Acoso

 

El Conseyu de Gobiernu de la Universidá d'Uviéu tamién dio lluz verde al cambéu del Protocolu pa la prevención y procedimientu d'actuación en casos d'acoso moral, sexual y/o por razón de sexu, discapacidá, orientación sexual, identidá de xéneru, creencies o cualesquier otru motivu nel ámbitu de la Universidá d'Uviéu. El testu, aprobáu per primer vegada n'avientu de 2018, fuera revisáu n'avientu de 2021, a los trés años, tal que marca na so redacción. "Pero por cuenta de la nueva Llei d'Igualdá foi necesaria una nueva adaptación del testu", esplicó Humberto Rodríguez Solla, vicerrector de Relaciones Institucionales y Coordinación, que, amás, ufiertó unes cifres sobro l'aplicación del protocolu. En concretu, dende 2018, activóse'l protocolu en siete causes, de les que seis casos fueron resueltos na fase de mediación. El restante, sigue pindiu de resolvimientu. Seis d'esos casos correspuenden a situaciones que tuvieron llugar ente miembros del personal docente ya investigador de distinta categoría,  ente que'l restante correspuende a un casu ente PAS y PDI. 

 

Creación de dos nuevos centros universitarios

 

Per otru llau, el Conseyu de Gobiernu de la Universidá d'Uviéu dio lluz verde a la creación de dos nuevos centros universitarios. En concretu, tratar del Centru Universitariu d'Investigación y Desenvolvimientu de l'Agua (CURIA) y del Centru Universitariu de Investigación Asturies Raw Materials (AsRaM), dambos con see nel Campus de Mieres. El primeru d'ellos, CURIA quier convertise nuna ferramienta de dinamización ya innovación, de tresferencia de conocencia y tecnoloxía, que va actuar de nexu ente los distintos axentes de la comunidá de l'agua. Ente los sos oxetivos, figura potenciar la innovación y la prestación de servicios científicos y tecnolóxicos a instituciones, alministraciones y empreses públiques o privaes. 

 

En cuanto al Centru Universitariu de Investigación Asturies Raw Materials (AsRaM), busca promover la investigación  ya  innovación en tecnoloxíes llimpies  y meyores  técniques pa la producción de materies primes minerales y bióticas n'Asturies, fomentar sinergias  con empreses  ya instituciones  del sector, ameyorar    la percepción social  de l'actividá extractiva      cuando ye desenvuelta responsablemente,  avanzar na caracterización de los recursos y nos procesos extractivos sostenibles ya investigar nel campu de les materies primes bióticas y soluciones sostenibles. Dambos centros tienen que cuntar agora cola aprobación del Conseyu Social. 

 

Nueves midíes pal amenorgamientu del consumu enerxéticu

 

Na xunta celebrada esta mañana, tamién s'informó sobre la nueva instrucción de Xerencia relativa a les midíes d'aforru del consumu d'enerxía. Nesti sentíu, el xerente esplicó les nueves midíes a adoptar per parte de la comunidá universitaria. Ente elles, figura'l zarru de les instalaciones universitaries ente'l 27 d'avientu de 2022 y el 5 de xineru de 2023, los díes 3, 4 y 5 d'abril y del 1 al 15 d'agostu de 2023;  la riegla xeneral de nun realizar actividaes nes fines de selmana y festivos (con esceición d'actividaes docentes oficiales o actividaes ayenes nes que se va pasar el correspondiente cargu n'enerxía al solicitante); la regulación de la temporada de calefacción al periodu entendíu ente'l 15 de payares y el 15 de marzu; o la regulación de les acciones de ventilación.