El personal de les biblioteques del Grupu 9 d'Universidaes (G-9) diose cita nel Campus de Mieres de la Universidá d'Uviéu para participar les IV Xornaes de Bones Práctiques n'Atención a Espacios y Usuarios. La finalidá principal d'esti alcuentru ye apurrir un espaciu d'alderique onde compartir moliciones, idees, problemes y soluciones a cuestiones rellacionaes col desempeñu diariu d'una de les xeres esenciales de la biblioteca: l'atención personal y directo al públicu.

 

Les xornaes, celebraes el pasáu xueves y vienres, dexaron compartir les esperiencies d'adaptación d'espacios y servicios a la situación de pandemia y analizaron tamién cómo se superaron toles adversidaes para tratar de dar el meyor serviciu posible a los usuarios.

 

Fausto González, director de la Biblioteca de la Universidá d'Uviéu, afirmó que, dende l'últimu alcuentru fai yá trés años, "protagonicemos cambeos azotaos ya imprescindibles, nos que les biblioteques afiximos los espacios y servicios para responder a la situación d'emerxencia sobrevenida, tratando de dar el meyor serviciu posible".

 

"Nesti momentu, asumiendo que'l mundu va volver a la normalidá de forma paulatina, paez aconseyable dedicar un tiempu a la reflexón d'un futuru postpandemia que paez que va venir acompañáu de cambeos rápidos y fondos y que dalgunos yá califiquen de cambéu d'era", añede. Estes xornaes dexaron compartir les esperiencies d'adaptación d'espacios y servicios mientres y tres la situación de pandemia, teniendo en cuenta la perspectiva del impactu de la crisis sanitaria. Les xornaes, na que participó 55 persones, taben dirixíes al personal que trabaya na atención al públicu y sales de llectura de les biblioteques y a los responsables d'equipos y unidaes d'atención a usuarios de les biblioteques universitaries de Grupu 9 d'Universidaes (G-9).