El Colexu Notarial d'Asturies y l'Universidá d'Uviéu roblaron esta mañana un conveniu al traviés del que se crea la Cátedra de Derechu Notarial, que naz col propósitu de fomentar, impulsar y espublizar ente l'estudiantáu y los egresados de la Facultá de Derechu de la Universidá d'Uviéu la formación específica nesti campu. El conveniu, robláu por María Isabel Valdés-Solis, decana de Colexu Notarial d'Asturies, ya Ignacio Villaverde, rector de la Universidá d'Uviéu, tien xuna vixencia de cuatro años.

 

La cátedra va realizar diverses actividaes formatives, como conferencies, seminarios, talleres y contempla la participación de la Universidá d'Uviéu nel diseñu de planes de formación d'interés común. Inclúi tamién el financiamientu de práctiques esternes remuneradas d'estudiantes de grau y máster, según otres ayudes formatives p'alumnos de doctoráu o postdoctorales. 

 

La promoción del derechu notarial o del oficiu de notariu tamién va tener cabida nes actividaes de la cátedra, que va desenvolver actividaes divulgatives sobro'l sector, como la organización de congresos o la edición o financiamientu de publicaciones. La investigación na área del derechu notarial va ser otra de les cuestiones recoyíes na nueva cátedra, que va integrar nel so programa'l patrociniu del Premiu "Miguel Travieses" y va incentivar el desenvolvimientu de nuevos proyectos por aciu nuevos premios o ayudes predoctorales o postdoctorales.

 

El rector de la Universidá d'Uviéu, Ignacio Villaverde, amosóse bien satisfechu cola firma d'esta cátedra y estimó al Colexu Notarial d'Asturies el so apueste pola formación y pola Universidá d'Uviéu. "Les organizaciones colexales que representen a los profesionales en determinaes árees pueden y tienen de cuntar cola Universidá d'Uviéu y col texíu investigador que podemos apurrir", esplicó'l rector, qu'añedió que "estos convenios suponen xuna especial riqueza pal nuesu estudiantáu". "Gracies a esta cátedra, van poder conocer meyor en qué consiste'l derechu notarial y l'oficiu de notariu", manifestó Villaverde, que fixo fincapié en que ta ye la primer cátedra de derechu de la Universidá d'Uviéu. 

 

Pela so parte, María Isabel  Valdés-Solis, decana de Colexu Notarial d'Asturies, esplicó que "ye fundamental la collaboración cola Universidá d'Uviéu, qu'a la so disposición les conocencies xurídiques y profesionales del notariado" y añedió que la cátedra va dexar averar a los estudiantes el llabor del notariu nel so día a día, amosando la so  presencia nos actos más trascendentes ya importantes de la vida de les persones.  "Formamos parte de la vida xurídica de les mesmes, la nuesa función ye recoyer los lícitos deseos de los otorgantes, asesora-yos, redactalos y da-yos forma xurídica llegal. Apurrimos a la sociedá la seguridá xurídica necesaria pa les sos relaciones, contribuyendo a la paz xurídica" dixo. A lo último, estimó a la universidá la so collaboración pa la puesta en marcha d'esta cátedra que, de xuru, "va dexar un arriquecimientu pa dambes instituciones". 

 

Al actu tamién asistieron Begoña Cueto, vicerrectora de Tresferencia y Relaciones cola Empresa; Herminia Campuzano, catedrática de Derechu Civil y directora de la cátedra; Javier G. Fernández Teruelo, decanu de la Facultá de Derechu, y Jorge García García, director d'área de Tresferencia y Cátedres d'Empresa.