La compañía Y2K Global Business Solutions, factoría de servicios nel ámbitu del sector asegurador, al traviés del centru tecnolóxicu ebroker allugáu en Pravia, y l'Universidá d'Uviéu, sentaron güei les bases de la collaboración ente la empresa y l'institución académica, cola firma d'un protocolu d'intenciones al traviés del cual dambes organizaciones van reforzar el so compromisu pal desenvolvimientu conxuntu d'actividaes de tresferencia, empleabilidá, lo mesmo que de espardimientu y execución de collaboraciones docentes y d'investigación conxuntes esistentes. El documentu foi suscritu pola vicerrectora de Tresferencia y Relaciones cola Empresa de la Universidá d'Uviéu, Begoña Cueto; el vicerrector de Xestión Académica, José Miguel Arias, y el conseyeru delegáu de Y2K Y CEO de Ebroker, Higinio Iglesias.

 

La collaboración ente la Universidá d'Uviéu y Y2K Global Business Solutions establez un marcu institucional de cooperación que va promover el fortalecimientu de sinergias, la potenciación y proyección de la conocencia esperta de los sos equipos técnicos y el óptimo aprovechamientu de los recursos con que cunten dambes instituciones, col fin últimu de potenciar el desenvolvimientu tecnolóxicu del sector asegurador n'España.

 

Ente les distintes actuaciones que se van derivar d'esti alcuerdu de collaboración destaca la puesta en marcha d'un nuevu títulu propiu d'Especialista Universitariu en Ciencia de Datos aplicada a l'Actividá Aseguradora", que yá va tar enllantáu nel próximu cursu académicu 2022/2023 y que tien por oxetivu apurrir al estudiantáu xuna formación práctica y calidable na aplicación de les nueves Tecnoloxíes de la Información y la Comunicación, concretamente d'aquelles englobadas na Ciencia de Datos, a toles funciones que desempeñen los profesionales de l'actividá aseguradora.

 

El títulu va impartir n'horariu executivu (martes y xueves de 18:00 a 21:00) y formatu híbridu (presencial/online) pa garantizar que los estudiantes puedan aportar a una combinación de conocencies académiques y aplicaos a práctica d'esti nuevu contestu tecnolóxicu al empar que desempeñen la so actividá profesional. 

 

El conseyeru delegáu de Y2K, Higinio Iglesias comentó que "la cooperación ente universidá y empresa ye'l camín más directu escontra la competitividá empresarial al traviés de la capacitación ya impulsu al talentu. Esta iniciativa de la mano de la universidá d'Uviéu en redol al mundu del datu ye'l claru exemplu del compromisu de Y2K col sector asegurador y cola sociedá''.

 

El vicerrector de Xestión Académica de la Universidá d'Uviéu, José Miguel Arial, estimó a la empresa'l so apueste pola formación y señaló que "resulta de vital importancia afondar nes relaciones coles empreses pa dar respuesta a les necesidaes d'especialización y actualización de los sos recursos humanos". Pela so parte, la vicerrectora de Tresferencia y Relaciones cola Empresa de la Universidá d'Uviéu, Begoña Cueto, añedió que "les empreses van atopar na universidá un texíu científico ya innovador de gran calidá ente que la institución académica precisamos conocer de primera esquito les necesidaes que surden nel ámbitu llaboral pa poder avanzar pel bon camín nel campu académico ya investigador".

 

Al actu tamién asistieron Pedro Ramos, director d'Inxeniería de Proyectos en Ebroker; Jorge García García, director área de Tresferencia y Cátedres d'Empresa de la Universidá d'Uviéu; y Manuel Lluna, profesor de la Universidá d'Uviéu y director del títulu propiu de nueva creación.