La Universidá d'Uviéu y Banco Santander, al traviés de Santander Universidaes, anovaron güei el so conveniu de collaboración que va beneficiar nos próximos dos años a barganal de 600 estudiantes, entamadores ya investigadores de la institución asturiana d'enseñanza cimera. El nuevu alcuerdu foi refrendáu esta mañana pol rector de la Universidá d'Uviéu, Ignacio Villaverde, y Matías Rodríguez Inciarte, presidente de Santander Universidaes.

 

La firma d'esti conveniu estrecha entá ye más los llazos que dambes instituciones caltienen dende avientu de 2005 cuando se robló'l primer alcuerdu de collaboración. El conveniu suscritu güei contempla un mecenalgu añal de 550.000 euros para los próximos dos años centráu nos trés exes qu'anguaño impulsa Santander Universidaes: educación, empleabilidá y emprendimiento. L'alcuerdu ratificáu agora va favorecer a barganal de 600 mozos estudiantes, investigadores y entamadores, amás d'a aquellos que reciben les beques incluyíes nos programes globales de la institución financiera.

 

El rector Ignacio Villaverde, qu'estimó l'esfuerzu del Grupu Santander, destacó que'l conveniu ye un bon exemplu de la necesaria collaboración empresa-universidá. "Forma parte del ADN de la Universidá d'Uviéu que lo que se fai dientro de la institución sala de les aules y llaboratorios de la universidá y suponga, na práctica, un beneficiu para tola comunidá en términos de tresferencia de conocencia, impulsu económicu, creación d'empléu calidable y meyora de la competitividá n'una economía cada vez más glocal", afirmó'l rector. 

 

Villaverde recordó que la institución académica ye'l principal motor de la investigación n'Asturies. "Desenvolvemos el 80% de la I+D+i d'Asturies y disponemos de servicios y equipamientos piqueros para facilitar la tresferencia de conocencia escontra'l texíu granible. Amás, cuntamos con más de 500 contratos y/o alcuerdos con empreses para desenvolver proyectos d'investigación y tresferencia de la conocencia", añedió.

 

Matías Rodríguez Inciarte, pela so parte, felicitó al rector pola importante llabor que ta desenvolviendo la universidá y el so impactu na sociedá y recordó que "nel Santander creemos que la educación ye la meyor palanca para'l tresformamientu de la sociedá y para faer frente a dalgunos de los problemes d'un mundu tan complexu como'l que tamos viviendo."

 

El conveniu ratificáu esta mañana s'estructura en trés exes principales.

 

Educación 

Dambes instituciones van impulsar iniciatives como'l Programa Santander Universidá d'Uviéu d'ayudes predoctorales para la realización de tesis doctorales, con  10 contratos añales; el programa d'ayudes para'l personal investigador en formación para la realización d'estancies investigadores n'otres universidaes y centros d'investigación, que preve 40 movilidaes añales; ayudes para'l personal investigador en formación para la realización d'estancies n'empreses y la participación de la universidá nel programa de Beques Santander Progresu, con 8 beques de 1.000 euros caúna. 

 

Empleabilidá

Desenvolveránse cursos de formación en competencies dixitales, dirixíos a ameyorar la empleabilidá y les competencies entamadores -desenvolvimientu de apps, python, conteníu para redes sociales, xestión de proyectos- que van beneficiar a 500 persones.

 

Emprendimiento 

Para impulsar la cultura entamadora, la universidá y el Santander van impulsar iniciatives como'l programa de creación o aceleración de startups TalentUO-Santander; el Premiu escurres TalentUO-Santander empobináu a idees de negociu innovadores presentaes por equipos d'estudiantes de grau o posgráu; el Premiu d'Investigación empobináu a idees propuestes por equipos formaos por investigadores y docentes que dexen tresformar les resultancies d'una investigación nun productu oxeto d'esplotación comercial; el Premiu Práctica Empresarial para asociaciones d'estudiantes de grau o posgráu que desenvuelvan proyectos profesionales venceyaos cola so titulación, tean o non formalmente constituyíes como Junior Empreses y el programa de tutorización a entamadores con una previsión de 50 beneficiarios.

 

Adicionalmente, la Universidá d'Uviéu participa nos programes globales impulsaos por Santander Universidaes: 

Programes de beques: 

Tresformamientu dixital: app universitaria dientro del proyectu appCRUE, yá publicada.

Emprendimiento: participación nel programa Santander Explorer (centru mistu col Conceyu d'Uviéu) y Santander X.