El Grupu 9 d'Universidaes (G-9), asociación formada poles universidaes públiques españoles que somos úniques universidaes públiques nes nueses respectives Comunidaes Autónomes, faemos ecu del manifiestu recoyíu polos representantes de les 60 universidaes españoles participantes nes Xornaes de Servicios Universitarios d'Empléu, celebraes na Universidá de Málaga. 

 

Manifestamos el nuesu malestar y esmolición pola falta de interlocución col Ministeriu de Trabayu y Economía Social nel desenvolvimientu del marcu normativu que va regular les práctiques académiques esternes de los estudiantes universitarios esto ye, l'Estatutu de les persones en formación práctica nel ámbitu de la empresa ("Estatutu del becariu").

 

Asistimos con plasmu a una sucesión de borradores peneraos y de noticies de prensa que dan cuenta de la esistencia de negociaciones con distintos axentes sociales  al envís d'alcordar, nel marcu del diálogu social, un proyectu de testu normativu.

 

Tamién se publicó en medios de comunicación que se caltuvieron diverses xuntes ente responsables del Ministeriu y distintes organizaciones estudiantiles, ente otres. Sicasí, en nengún momentu cuntóse cola conocencia y l'esperiencia de les universidaes na promoción y la xestión de les práctiques académiques esternes que s'establecen nos distintos planes d'estudiu.

 

Nun entendemos por qué la norma que tien de regular les práctiques académiques del estudiantáu universitariu ye oxetu de negociación namá nel senu del diálogu social, cuando se trata d'un asuntu de naturaleza académica formativa de grau y posgráu y, por tanto, competencia nuclear del Ministeriu d'Universidaes.

 

Crue Universidaes Españoles ufiertóse repetidamente a tratar y apurrir les esperiencies acumulaes nesta tema col Ministeriu de Trabayu y Economía Social. Sicasí, reparamos con esmolición ya incomprensión que los trabayos nel senu de la mesa de diálogu social avancen y naide dionos la posibilidá de plantegar les cuestiones que nos esmolecen como responsables universitarios con competencies en práctiques académiques esternes.

 

La realización de práctiques esternes consiguió xuna modernización importante y xuna apuesta clave pola meyora de la formación y de la empleabilidá del estudiantáu. La Universidá ye la primera comenenciuda en que les sos egresados y egresadas cunten con ufiertes de trabayu dignes y acordes al so nivel competencial; pero les práctiques esternes tienen un calter puramente formativu y nun impliquen en nengún casu xuna relación llaboral. L'apurrir estes actividaes formatives supon xuna garantía de qu'el nuesu estudiantáu tenga'l perfil de egreso fayadizu pal so posterior insertamientu llaboral al empar qu'impulsa esa tan necesaria interrellación de la universidá col texíu empresarial y social.

 

Con ánimu collaborador y constructivu y col convencimiento de que podemos realizar aportaciones calidable, solicitamos al Ministeriu que se nos convoque de manera urxente a una xunta na que podamos tratar estos asuntos.